Guwahati, Jymmang 6: Haduh 4 ngut ki nongtrei bylla surok kila shah taplup bad iap shen ha ka jingtwa khyndew kaba la jia ha ka Shnong Moosing, kaba don ha ka surok Yingkiong-Tuting jong ka Siang District ha Arunachal Pradesh. Kane ka jingjia kala jia ha ka miet sngi palei.
Kat kum ka khubor bala ioh, kine ki nongbylla ki dang iathiah ha kawei ka sem bala shna harud ka surok ha ka por ba jia kane ka jingtwa khyndew.
Ka jingther u slap ha kine ki san sngi bala leit noh ha ka thain kala wanrah ia kane ka jingtwa khyndew kaba la pyndkut ia ka leit ka wan na Tuting bad kiwei pat ki jaka hapoh ka Ri. La iathuh ba kane ka jingtwa khyndew kala jia ruh ha kylleng ki jaka jong ka Arunachal Pradesh.
Na ka liang ki bor District kila hiar ban wad ia ka met jong kine ki nongbylla bad daka jingiarap lang jong ki nongtrei ka kompani shna surok, la lap noh hadien ia ka metiap jong baroh.
