Shillong, Jymmang 6: Ha kawei ka jingjia ba sngewsih kaba la pynkhihwin ia ka thain, uwei u rangbah ba kyrteng u Roning Nongkynrih ba 35 snem, ula shah siat iap ha ki shipai BSF ha shnong Mawshun marjan ka Pynursla halor ka jing suba ba u khaii masi beain. 
Kat kum ka khubor, kane ka jingjia kala jia hynnin ka miet por 11 baje eiei katba u Bah Roning uba la don arngut ki Khun ba dang 4 snem bad 4 bnai, u dang don ha lynti ban leitphai iing na Laitlyngkot.
Ki shipai BSF kila ther kuli ia ka trok jong u khlem da ai jingmaham, ha kaba u kuli ula leit dei naki bynta ka khlieh bad u ryndang. Hadien kane ka jingjia, ki shipai BSF kila phet krad na kane ka jaka.
Kane ka jingjia kala pynbitar lep ia ki nong shong shnong ka thain, kiba la dawa ban tohkit bad ai ka jingbishar kaba hok ia u bah Roning.
Ki paidbah trai shnong lem bad ki katto katne ki kynhun sengbhalang kila leit tur sha ka ktem shipai BSF ba don ha Pomshutia. Hynrei kumba long mynta, ka jinglong jingman kala kham jai jai.
Ia ka metiap u Bah Roning la wan pynkit noh sha Shillong Civil Hospital ban pyndep ia ka post mortem.
Na ka liang ki bahaiing u Bah Roning, kila dawa ban weng kam mardor ia u shipai BSF ula siat ia u Bah Roning ha kane ka jingjia.
I Kong Shaplang Nongkynrih, Kmienah u Bah Roning, ila pynpaw ia ka jingbitar halor kane ka jingleh riewkhlaw jong ki shipai BSF.
Haba iakren bad ki nongthoh khubor, ila dawa ban kem mardor bad weng kami a kito kiba donkti ban pyniap ia u Khunruit jong i. Ila dawa ruh ba shiteng na ka tulop jong une u shipai, dei ban ai sha ka Iing u Bah Ronin namar ba u dei u nongkamai khaw jong ka IIng.
U Bah Roning u dei u Kpa jong arngut ki Khun, iwei ba dang 4 snem bad iwei ba dang 4 bnai.
