Shillong, Jymmang 05: U Director General of Police (DGP) ka jylla Dr. LR Bishnoi hynne ka sngi Thohdieng, ula pyntip ba ka tnat Pulit kan nang iai bteng bad nang pynkhlain ha ka jingiakhun pyrshah iaka kam khaii drok khnang ban lah rat dyngkhong na kane ka jylla.
“Ngi la sdang ka thma pyrshah ia u Drok bad kane ka jingiakhun kan iai bteng ha baroh kawei ka jylla” la ong u Dr Bishnoi.
U Dr Bishnoi ula iathuh ba haduh mynta, ka tnat Pulit kala dep ban Register Case haduh 181 tylli bad haduh 224 ngut ki briew kynthup 37 ngut ki samla shynrang bad kynthei kila shah kem.
Ula iathuh ba na ki 224 ngut bala shah kem, 68 ngut kidei na kiwei ki jylla kum na Manipur, Tripura, Nagaland bad Arunachal Pradesh.
U Dr. Bishnoi ula iathuh ba haduh mynta, ka tnat Pulit kala ioh kurup 127 tylli ki kali bad 292 tylli ki mobile phones.
“Ngi la ioh ban kurup 11.6 kgs drok heroin hapoh shisnem ha ryngkat 4600 kgs u ganja, 50,000 bottles dawai jyrhoh beaun, 42000 drok yaba tablets bad 47,000 kiwei ki jait drok bad kane ka pyni iaka jingsdang kiew ki kam beain halor ki jait drok” ula ong.
Haba ong ba ka kam khaii drok kadei ka ba sniew, u heh Pulit ula ong “Namar kane donkam ka jingiatreilang na baroh ki liang haka imlang sahlang bad naka liang ka tnat Pulit ruh kan iai bteng iaka thma pyrshah u Drok ban rat dkhong napoh kane ka jylla”.
