Shillong, Jymmang 05 : U Director General of Police (DGP) ka Jylla Dr LR Bishnoi ula kyntu ia ki Nongialam bad ki samla pule jong ka Jaidbynriew Kuki bad ki Meitei kiba don ha Jylla Meghalaya, ba kin pynthikna ba kam dei shuh ban don ka jingiakynad ne jingsngewthuh bakla hapdeng jong ki hangne hapoh ka Jylla.
U DGP ula buh ia kane ka jingkyntu ha ka jingialang pyniasuk bad ki Nongialam na baroh artylli ki Jaidbynriew (Kuki bad Meitei) hynne ka sngi Thohdieng ha Nagaland House, Shillong, ban pynthikna ba ka jingshongsuk shongsain kan neh ha ka Jylla.
Ka jingiakynad bad jingiaumsnam hapdeng ki jaidbynriew Meitei bad kiwei pat ki riewlum khamtam ki Kuki, kaba jia mynta ha Manipur, kala wan poi sha Nongbah Shillong hynnin ka sngi Palei, bad haduh 16 ngut ki briew na kine ki ar jaidbynriew kila shah kem namar ka jingpynkulmar hajan Mizo Modern School, Nongrim Hills.
Hynrei, u DGP ula pyntip ba kane ka jingkem ka dei tang ka jingkem ban tem ia ka jingiakynad bad hadien la pyllait noh ia baroh 16 ngut tang da ka jingphah soi ia ka bond ban pynthikna ia ka jingshongsuk. U pyntip ba ia kine ki 16 ngut ym shym la phah satia sha along namar ka dei tang ka jingkulmar kaba rit.
Ka tnad Meghalaya Police kala khot ia ki Nongialam kynthup ki Nongialam jong ki samla pule na kine ki artylli ki Jaidbynriew ba kin pynthikna ba kam dei ban nang don ka jingiakynad ne jingiasngewthuh bakla hapdeng ki ar jaidbynriew ba shong ba sah ha Jylla.
“Hadien ki jingjia ba ishyrkhei ha Imphal bad ha kiwei ki bynta ka Manipur, ngi la rai ba kam dei shuh ban don ka jingiasngewthuh bakla hapdeng ki Nongshongshnong jong kine ki ar Jylla kiba im ba sah ha Meghalaya. Namar kata, kum ka sienam ban tehlakam, ngi la khot ia kine ki Jaidbynriew bad ki Nongialam jong ki Samla Pule na baroh arliang bad ngi la pynpaw ia ka jingsngewkhia jong nga ia kano kano ka jingbym iashaniah lane jingbym iasngewthuh jingmut” ong u DGP.
Hadien ka jingiakulmar hapdeng kine ki ar Jaidbynriew hynnin ka sngi palei, u DGP ula pyntip ba ki Nongialam na baroh artylli ki jaidbynriew kila shah khot sha Laitumkhrah Police Station bad kila kular ba kin pynneh ia ka jingshongsuk bad ba kin nym pynsngew shuh ia kino kino ki jingbym iasngewthuh jingmut.
“Ki Nongialam na baroh artylli ki jaidbynriew kila pynsngew iala ki jong ki jingsngew bad ki Pulit bad ngi la ai jingmut kumno ban leh hadien ka jingjia ba hynnin ka sngi. Baroh kila kular ba kin bat ia ka jingshongsuk shongsain” bynrap u DGP.
U DGP ula pyntip ruh ba ki Nongialam na baroh artylli ki Jaidbynriew kila kular ban ai ka jingiatreilang ba pura bad ka Tnad Meghalaya Police.
