Shillong, Jymmang 04: Ka sorkar jylla lyngba ka tnat jngoh kai pyrthei kala shim iaka rai ban pynbun shuh shuh iaki jaka sah kai naka bynta ki nongwan shangkai suwari hapoh ka thain Sohra, ban pynbha iaka Pinewood Hotel, ka Orchid Hotel ha Umiam bad ha Mawkasiang.
Ka tnat jngohkai pyrthei kala shim ruh iaka rai ban pyntrei noh lyngba ka Joint Venture ha ki katto katne ki Hotel lane Units lyngba ka PPP Mode naka bynta ban kyntiew iaka ioh ka kot haka pla tyngka ka sorkar jylla.
Haba kren sha ki lad pathai khubor u Myntri ka tnat jngoh kai pyrthei ka sorkar jylla bah Paul Lyngdoh ula iathuh ba ka sorkar kala shim iaka rai ban pynbha bad pynitynnad shuh shuh iaki Circuits khamtam kaba don ha Sohra.
U bah Paul ula iathuh ruh baka tnat jngohkai pyrthei kala tyrwa ruh ban tei daka Theme Park ka ban sdang na Mairang Eastern West Khasi Hills bad kan kynthup lang shaduh Ranikor South West Khasi Hills bad kan poi ruh shaduh u pud u sam ka jylla Assam.
Ula ong ba kane ka Theme Park kan don ha ki thain ban pynsuk iaka leit ka wan ki paidbah khamtam ki nongwan shangkai suwari daka ba pynjanai iaka leit ka wan bad ban pyniasoh ruh shaka Kad Lengsuin Guwahati.
“Daka tei iaki Theme Park kiba iajan bad ki Kad Lengsuin kan pynsuk iaka leit ka wan bad kane kan nang khring shuh shuh iaki paidbah khnang ba kan lah ban kyntiew iaka ioh ka kot jong ka jylla Meghalaya“ la ong u bah Paul.
U bah Paul ula iathuh ba ia kine jingtyrwa daka tnat kam jngohkai pyrthei la shim haka jingialang bad la long hynne ka sngi haka jingdon lang u myntri rangbah u Conrad K Sangma, u Chairman ka Meghalaya Tourism Development Corporation (MTDC) u bah Sanbor Shullai lem bad ki heh ophisar ka sorkar jylla.
