Shillong, Jymmang 04 : Ka Sorkar Meghalaya hynne ka sngi Palei kala rai ban pynkhreh ia ki jingdonkam baroh ha kaban leit shaw noh ia palay 200 ngut ki samla pule ka Jylla, kiba pule ha Jylla Manipur namar ka jingkulmar kaba mih na ka jingiakajia jaidbynriew.
U Myntri Rangbah ula lum ia ka jingialang ba kyrkieh hynne ka sngi bad ki Heh Ophisar ka Jylla ban pynpaw ba ka Jylla ka dei ban pynthikna ia ka jingshngain jong ki samla pule kiba don ha Manipur.
Hadien ka jingialang, u Myntri Rangbah ula ong ba ka Sorkar Jylla kala peit thuh bha ia ka jinglong jingman ha Manipur.
“Ngi la iakren bad ki samla pule jong ki jaka pule bapher bapher bad ngi la pynkhreh ruh ia ki jingdonkam kum ka Sorkar Jylla ban pyrshang ha kaban leit shaw iala ki jong ki samla pule na katei ka Jylla khnang ba kin lah ban wan phai suk shala iing” ula ong.
Kat kum ka jingong jong u, ka jingpynbeit ia ka leit ka wan khamtam da ka liengsuin, lah pynkhreh mynta khnang ban lah ban wanrah kloi noh ia ki samla pule ka Jylla na Manipur. U ong ba ki don kumba 200 ngut ki samla pule na Meghalaya kiba pule ha Imphal.
Haba pynpaw ba ka Sorkar kala buh ruh ia u helpline number, u Myntri Rangbah ula ong “Ki samla pule bad ki Kmie Kpa ki lah ban phone baroh 24 kynta lada ki donkam ia kano kano ka jingiarap lane lada mih kano kano ka kam kaba kyrkieh”.
Haba kyntu ia ki Kmie Kpa bad ki samla ba kin ym khuslai hynrei ban long jai jai, u Conrad ula ong “Ngi la peit thuh bha ia ka jinglong jingman bad ngi la iakren khlem sangeh bad ka Sorkar Manipur bad ngi la shim ia baroh ki sienjam ba lah ban shim ban pynthikna ba ngin lah ban leit shwa noh kham kloi iala ki jong ki samla pule ba kin wan phai sha Meghalaya”.
Ha kajuh ka por, u Myntri Rangbah ula kyntu ia baroh ki nongshongshnong ka Jylla Manipur ban pynneh ia ka jingshongsuk shongsain bad ban kiar na kino kino ki kam iaumsnam haba ong “Nga kwah ban kyrpad ia ka jingsuk bad nga kwah ruh ban kyrpad ba kino kino ki jingeh kiba don, ngi dei ban pyrshang bad pyrshang ia ki da ka lynti ba jai jai”.
