Shillong, Jymmang 04 : Namar ka jingnang jur bad jingnang saphriang ka jingiaumsnam ha kylleng ki jaka ka Jylla Manipur, ka Sorkar hynne ka sngi Palei kala pynmih ia ka hukum ban “Siat naphang” ia ki nongpynkulmar.
Ha ka hukum bala pynmih da u . Ranjit Singh,Commissionr (Home), ka Sorkar Manipur, la ong “..khnang ban tehlakam ia ka jingkulmar bad ka jingshongsuk hapoh ka Jylla, u Lat ka Jylla Manipur u sngewbha ban aibor ia ki District Magistrate, Sub Divisional Magistrate bad baroh ki Executive Magistrate/Secial Executive Magistrate bala thung da ki District Magistrate ba kin ai ia ka hukum ban “siat naphang” ha ki khep lada baroh ki lad iakren sngewthuh, jingmaham, jingpyndonkam ia ka bor bad kiwei kiwei, kam treikam satia kat kum ka kyndon jong ka CrPC 1973 bad ka jingbym lah ban tehlakam ia ka jinglong jingman”.
Ha kajuh ka por, ki liengsuin iapom jong ki shipai Indian Airforce ba kit ia ki shipai, kila wan poi hynne ka janmiet ha Imphal.
Palat 9000 ngut ki briew kila hap ban phet nala ki jong ki Iing hadien ka jingsaphriang ka jingiaumsnam hapdeng ki paid riewlum bad ka Jaidbynriew Meitei ha Manipur, kaba la dawa ban wanrah haduh 55 column ki shipai Indian Army bad ki Assam Rifles.
U Nongaiktien ki shipai u pyntip ba haduh 14 column ki shipai la buh pynap ban phah sha Manipur lada dang jur ka jingia umsnam.
Nalor kane, ka kynhun Rapid Action Force (RAF), kaba dei ka kynhun ba peit ia ka jingiakulmar Jaidbynriew, la phah sha ki jaka ba jur ka jingiaumsnam ha Manipur da ka Sorkar India, kaba la peit thuh ia ka jinglong jingman ha kane ka Jylla.
Ka jingkulmar Jaidbynriew kala khie hynnin ka sngi Balang hadien ka jingmih ialeh pyrshah da ka Jaidbynriew ba iakhun pyrshah (Meitei) hadien ba ki riewlum Naga bad Kuki kila pynlong ia ka Tribal Solidarity March ban iakhun ki Jaidbynriew Meitei ia ka jingdawa ithuh kum ki ST.
Ha kajuh ka por, ka Sorkar kala pynjari da ka hukum khang kor internet ba san sngi kynthih ha baroh kawei ka Jylla hadien ba la jur ka jingjia umsnam ha kiba bun ki jaka khamtam ha Churachandpur, Senapati, Chandel, Kangpokpi, Tengnoupal, Imphal West, Imphal East, Bishnupur, bad Jiribam districts.
