Shillong, Jymmang 03: Ki dkhot ka Hynñiewtrep National Youth Movement (HNYM) hynne ka sngi kila tur kynsan sha ophis ka Hima Mylliem ha Mawkhar ha ryngkat ka jingthmu ban khang tala ia kane ka ophis halor ka jingkuman ban pyndam noh iaka jinglong Acting Rangbah Shnong ki jaitbynriew Garo ha ki shnong ba hap ha u pud u sam ka Hima Mylliem.
Kane ka jingthmu jong ka HNYM kala pulom noh namar ka jingdon ki Pulit bad ka jingkloi ki Myntri ban iakren bad ki nongialam ka seng.
Hadien ka jingiakren bad ki Myntri ka Hima Mylliem, naka liang ka seng HNYM kala ai por 3 sngi iaka Hima Mylliem ban weng noh iaka jingaibor iaki jaitbynriew Garo ban long Acting Rangbah shnong ha ki shnong ba hap ha u pud u sam ka Hima.
Haba kren sha ki lad pathai khubor u President ka HNYM u bah Louis Dohtdong ula ong ba ka seng kan ai por iaka Hima Mylliem ban leh iaka ba donkam bad hadien 3 sngi ka seng kan shim daki sienjam ba tyngeh lada kane ka jingdawa kam urlong.
U bah Louis ula ong ba kane ka jingdawa jong ka seng ban weng noh iaka jingaibor ban long Acting Rangbah Shnong ki jaitbynriew Garo kadei naduh 2022 hynrei haduh mynta ka Hima Mylliem kam shym la sngap ia kane ka jingdawa ka seng.
Ula kynnoh ba kane ka jingpyrshah iaki Jaitbynriew ban long Acting Rangbah shnong ha ki shnong ba hap ha u pud u sam ka Hima Mylliem kadei namar ba kine kine ki Acting Rangbah shnong kila pyndonkam bakla iaka bor, daka ba ai NOC naka bynta ban die iaki jaka sha ki bar jylla.
“Ngin ap 3 sngi bad lada ka Hima Mylliem kam weng noh iaka jingai bor iaki jaitbynriew Garo ban long Acting Rangbah Shnong, ka seng kan sa shim da kiwei pat ki sienjam ban tur biang sha kane ka ophis treikam” la maham u bah Louis.
