Shillong, Jymmang 02 : Ka jingtih dewiong da ka jingstad saian kala ap ban sdang noh hapoh ka Jylla hadien ba ka Sorkar India kala ai jingmynjur ia ki mining lease jong ki saw ngut nongtih par.
Haba pyntip ia kane hynne ka sngi ba-ar, u Myntri Rangbah Conrad K Sangma ula ong “Nga sngew kmen ban pyntip sha phi ba shitaiew lane 10 sngi hashuwa, ka Sorkar India kala mynjur ia ka mining lease jong ki 4 ngut ki nongtih par. Namar kata, ngi la lah ban jop ia ka jingeh kaba khraw duh ba ngi la iatakhuh ha ban lah tih dewiong da ka jingstad saian bad kat kum ka ain ha Jylla”.
Ia kane ula pyntip hadien ka jingialang ba ula lum bad ki heh jong ka Central Mine Planning & Design Institute Limited (CMPDI) lem bad ka Tnad Forest bad Mining ka Jylla hynne ka sngi.
“Kumta, shisien ba ngi la dep pynlong ia ka Public Hearing bad la ioh jingmynjur ia ka forest clearance bad mining plan kiba dei ki kam ba hap leh, ia kiba ngi la khmih lynti ban dep hapoh 20-45 sngi, ngin sa ioh jingbit ban sdang ia ka jingtih dewiong da ka jingstad saian” ula ong.
U Myntri Rangbah ula ong “Hooid, ka jingpynreikam kan dei da ki nongtih par kiban pyndonkam ia ki kor ki bor ba donkam kat kum ka mining plan hynrei ka mat jong nga hangne ka long ba ka khyllipmat ba la ai ia ka lease, kane ka dei ka sienjam ba kongsan namar hadien kata, kumba nga ong, ngi la jam ia u mawjam ba eh duh bad mynta ngi la don ha ka lynti ban iohi ia ka jingsdang tih biang ia u mawpoh khyndew ha Jylla”.
Haba kylli, u Myntri Rangbah ula ong ba mynta ka lynti kala shai ba shano ka Jylla kan poi.
“La kumno kumno ruh ngin sa iohi iaka jingsdang tih dewiong da ka lynti ka ain. Shuwa kane, watla ngi tip ba ngi la iaid ha kaneka lynti, hynrei ngim tip lano bad kumno kane kan urlong hynrei mynta kala shai kdar” ong u Conrad.
“Mynta nangne shakhmat ngin hap ban pynthikna ba ngin nang pynjanai ia ka jingtreikam halor ki kyndon bala buh, ngin nang pynjanai, ngin nang pyniar, ngin nang ai bun ki licence bad mining lease sha ki briew khnang ban gin lah iohi biang sa shisien ia ka jingkiew ha ka kam tih marpoh khyndew kumba la long shuwa ka jingkhang jong ka NGT” ula bynrap.
Ha kajuh ka por, u Myntri Rangbah bad kiwei ki Myntri jong ka Sorkar MDA kin sa shah pynkup burom ha ki nongtih par ha Nongstoin mynta ka taiew.
“Ki Nongtih par kiba ioh ia ki mining lease kila khot ia ngi sha ka jingialang kaba rit ha kaba ki iakwah ban pynkup burom ia nga bad ia kiwei ki Myntri jongka Sorkar kum ka dak ban pyni ia ka jingsngew nguh ia ka jingshimkhia jong ka Sorkar ban pynthikna ha kaban poi haduh une u pud” ula ong.
Pule lang ia kane: Mih ka samla na Nongstoin kaba shna ia ka kali robot ban pynlip ding
