Shillong, Jymmang 02 : U National President ka National People’s Party (NPP) bad Myntri Rangbah ka jylla Conrad K Sangma, hynne ka sngi Ba-ar ula pynpaw ia ka jingsngew skhem jingmut ba u kyrtong ka Seng NPP Bah Samlin Malngiang un ioh khur ia ka jingjop haka MLA Election na Sohiong constituency ka ban long la 10 tarik Jymmang.
“Ngi lah trei shitom bad ngi la iaid ialap elekshon ha kylleng ki jaka ka thain Sohiong bad ngi sngewskhem ba ngin ioh iaka jingkyrshan ha ki shnong ki thaw. Bun ki nongialam na ki seng sain pyrthei bapher bapher kila iohi ia ka rukom treikam jongka sorkar bad ka jingshisha ba ka seng NPP ka dei kaba ialam iaka sorkar jylla” ong u Myntri Rangbah.
Ka Sohiong constituency ka pynkhreh ban leit ha ka jingiathep vote ha ka 10 tarik u Jymmang, ban jied ia u nongmihkhmat sha ka iing dorbar thawain ka jylla.
Haba iakren bad ki nongthoh khubor, u Conrad Sangma ula ong, “Ka jingshisha ka long ba ka National People’s Party ka ialam iaka sorkar jylla. Ka don ka jingsngewskhem jingmut kaba khlain ha ki paidbah ka Sohiong ba ki kwah ban don bad ka seng kaba ialam ia ka sorkar, khnang ba ka Sohiong constituency kan ioh pdiang kyrhai ia ki kam pynroi”.
“Da kaba buh hakhmat eh ia kitei ki mat, ngi la iohi ba ka jingwan ai jingjyrshan jong ki paidbah ka long kaba biang bha bad ngi sngewskhem bha ban ioh ia ka jingjop” ula bynrap.
Pule lang ia kane: Ka kam rep tit ka lad kamai spah ïa ki nongrep ha Jylla
