Nongstoiñ, Lber 27: Ka long ka jingsngew sarong ïa ka dong ka thaiñ Nongstoiñ namar ka jingdon ki khun samla jong ka thaiñ kiba wan shakhmat ha ki jingpule. Kawei na kiba kum kine ki samla kiba aiti shisha ïalade ban poi sha ka thong, ka dei ka samla Kmenda Mary Wahlang, ka samla ba shong ba sah ha Upper New Nongstoiñ West Khasi Hills.
Kane ka samla ka dei ka khun jong u Bah Boniphas Riangshiang (bam kwai ha ïing u Blei) bad ka kong Bibiana Wahlang.
Kane ka samla ka la pass ha kawei na ki kyrdan bala tip kum ka M.Tech lane Master of Technology na kawei ka College ba hakhmat duh jong ka Ri kaba kyrteng National Institute of Technology (NIT) College na Warangal, Telengana ha ka laiñ Electronic Instrumentation.
Haba ïakren bad u nongthoh khubor kane ka samla, ka la ong ba ka la pyndep bun ki project ha ka jingpule ka jong ka bad kawei na kita ki project, ka dei ka jingshna ïa ka kali robot kaba lah ban pynlip ding, ban ïarap ïa ki briew bad ban wad jingtip ha kano kano ka por ba jia ka jingpluh ding lada jia kum kita.
Ym tang katta, shuwa ba kan ïoh pule ïa ka M.Tech ha ka National Institute of Technology (NIT), kane ka samla ka la pass ruh bun tylli ki kyrdan bad ki exam kum ka B.Tech na IAMR College of Engineering, Meerut Uttar Pradesh, kynthup ki International exam kum ka TOEFL Exam, GRE Exam bad kawei ka Exam kaba kham eh bha ïa kaba la tip kum ka Gate exam, kaba dei kawei na ki exam kiba kham ñiar eh kiba lah ban pass namar ka long kaba eh.
La ong ba ym tang ha ki jingpule hynrei kane ka samla ka don ruh ïa ki sap bapher bapher kum ki sports, ki exhibition, ki jingrwai, jingshad bad kiwei kiwei bad ka la ïoh ruh bun tylli ki takma, shibun ki syrnod na ka Science Exhibition ïa ki Satellite, debate, essay, Table tennis, bad kiwei kiwei. Ka la ïoh ruh ban rah ïa ka nam Miss Utsav ha ka jingïakhun thei bhabriew ba la pynlong ha Ghaziabad.
Kane ka samla ka la ïoh ruh ïa ka kabu ban leit pule ha ki 2 tylli ki kolej technology kiba don shabar ka Ri India hynrei namar ki jingjia ba sngewsih ha ïing, kala pynlong ia ka ban pep.
Mynta kane ka samla ka la trei kum ka Design Verification Engineer hapoh ka Multi National Company bad ka la trei ha ka kyrdan kum ka Technical Lead and Reporting Manager. Da kane ka jingkamai jong ka, ka la lah ban kyrshan lem ïa la ka kmie bad ïa ki 4 ngut ki para.
Kumban shu pynkynmaw ba ka West Khasi Hills District hi ka dei kawei na ki District kaba dang sahdien ha kiba bun ki liang, la ha ka roi ka par ka koit ka khiah khamtam eh haba ïadei bad ka pule puthi ne ka jingnang jingstad.
Hynrei, haba mih ki samla kiba la wanrah nam bad ka burom ïa la ka thaiñ, ka la long ka nuksa kaba bha shisha ïa kiwei pat ki para samla kiba dang don ha ki jingpule ba kin ïoh mynsiem, khamtam ha kum kane ka juk kaba hiran ha ka ïoh kam ïoh jam kaba la pynduh jingkyrmen wat ïa ki kmie ki kpa ba kin kyrshan ïa la ki khun ha ki jingpule.
Pule lang ia kane: Ka kam thaiñ jingthaiñ da ki siej ka lad kamai ha ki samla Nongkyndong
