Shillong, Jymmang 01: Ki longkmie jong ka shnong Syntein, East Khasi Hills District mynta kila die ia ki tiar kiba la thain da ki kti sha ki 5 Star Hotel bapher bapher bad ka jingkhublei ka leit sha ka prokram “Mann Ki Baat”.
Ia katei la iathuh da u Nongaiktien ka BJP uba long ruh u MLA barim ka Mawsynram u Bah Himalaya M Shangpliang hynne ka sngi.
U Bah Shangpliang ula ong, baka prokram Mann Ki Baat kadei kaba pyniasoh ia ki paidbah ka ri bad u Myntri Rangbahduh ka ri u Narendra Modi.
Ula ong ba u Myntri Rangbahduh ka ri ula pynshlur ia ki nongseng kam lajong.
“Ngi don ha ka jylla ka jong ngi ia ka shnong Syntein ha kaba ki longkmie ki shna ia ki shang, ki shna iaki jingshna bapher lyngba ki siej. Ka pyrthei kam tip eiei ia kane. U Myntri Rangbahduh ka ri, ha ka Episode ba 99 jongka Mann Ki Baat prokram, ula iakren sani bha bad ki briew jong ka shnong Syntein. Ngi la pynlong iaka jingpyni iaka Live Telecast ha kaba ki paidbah ka shnong Syntein kila sngewkmen ban iohi markhmat ia u Myntri Rangabhduh ka ri haka screen” ong u Bah Shangpliang.
“Hadien ka Mann ki Baat bad Myntri Rangbahduh ka ri, Nga kwah ban iathuh ia phi, ba kila don bun ngut kiba la ai ka jingpynpaw ka jongki ia ka shnong Syntein. Ki kwah ban thied ia ki tiar bad ia ki jingshna bad mynta ki paidbah ka Syntein kila die Online iaki mar ki jongki ha kylleng ka ri bad ki ioh ruh iaka order ne jingpan thied na ki 5 Star Hotels khnang ba kin ioh buh ia kitei ki jingshna ha ki hotel jongki” ong u Bah Shangpliang.
“Nga hap ban ong, ba ka prokram Mann Ki Baat kala kylla long kum ka lad ban pyni sha ka pyrthei ia ka jingdon jingem jong ki thain nongkyndongbad nga ai khublei ia u Myntri Rangbahduh ka ri uba la sdang ia katei ka prokram Mann Ki Baat ha kaban pyni ia ka jinglong ka ri sha kiwei pat ki ri” ong u Bah Shangpliang.
Nalor kane, ula iaroh iaka jinglah ban pynlong iaka episode ba 100 jong ka Mann Ki Baat, khamtam haba ia kane ka prokram la peit lut da ka ri baroh kawei bad kumjuh ha kylleng ka pyrthei.
