Shillong, Jymmang 01: U Lat ka jylla Meghalaya u Phagu Chauhan hynne ka Lah Sngi u Blei, ula ai khublei iaki jaitbynriew Gujarati bad Marathi ha ka sngi ioh Jylla ka Gujarat bad Maharashtra.
Ha kaba rah shakhmat ia ka jingpeit bniah jong ka sorkar halor ka jingrakhe ia ka jingdon ki deiriti bapher bapher jong ka ri bad ki dustur ba bun jait, mynta ka sngi la rakhe ia ka Sngi ioh Jylla ki artylli ki Jylla ha Raj Bhavan, Shillong.
Ha ka jingpynurlong ia ka jingngeit jong ka Ek Bharat bad Shresth Bharat kaba rakhe ia ka ‘jingiatylli hapdeng ka jingbun ki jingiapher’ jongka ri, ki Raj Bhavan (Iing jong u Lat) ha kylleng ka ri, ki pyndon burom ia ka Sngi Ioh Jylla ka Gujarat bad Maharashtra da ka mynsiem shitrhem da kaba pyni ia ka deirit ba riewspah jong ki artylli ki jylla. Ka Sorkar Pdeng kala rai ba baroh ki jylla kin rakhe ym tang ia la ka sngi ioh jylla lajong, hynrei kumjuh ruh ia ki sngi ioh jylla kiwei kiwei ki jylla ban kyntiew ia ka ‘Ek Bharat Shreshtha Bharat’.
U Lat ka jylla Meghalaya, u Phagu Chauhan ula plie ia ka prokram Cultural Evening – Sanskritik Sandhya ba la pynlong da ka Indian Council for Cultural Relations (ICCR), Shillong ban rakhe ia ka sngi ioh jylla bad ai khublei ia ki jaitbynriew Gujarati bad Marathi ha ka sngi ioh jylla jongki bad ka kitbok kitrwiang ia baroh ki dkhot bad la pyni ia ki video lyngkot ha kane ka prokram halor ka deiriti ba riewspah jong kine ki artylli ki jylla.
Ban kyntiew bad pynkhlain ia ka jingiadei kaba jan hapdeng ki briew na ki bynta bapher bapher jong ka ri, kiba trei ha Meghalaya, ka iing u Lat ka Jylla ka la khot sngewbha ia ki briew ban rakhe lang ia ki sngi ioh jylla kine ki artylli ki jylla ba don sha ka phangsepngi.
Ka Sanskritik Sandhya ka la pynbyrnia ia ki briew ba don ha kane ka jingialang da ki jingrwai bad ki jingpule poitri na u Dr Sunil Yogi, Kong Silvi Passah, Moh Khalid Khan, u MP Pandey bad kiwei kiwei ki riewpawkhmat bad la khot sngewbha ia ki briew na ka jaitbynriew Gujarati bad Marathi, kynthup ki ophisar sorkar, ki nongkhaii, ki briew ba trei ha ki kynhun sorkar bad ki dkhot jong ki kynhun shipai ryngkat bad kiba haiing jong ki ban sakhi ia kane ka prokram.
