Shillong, Jymmang 01: Ka seng KSU ryngkat bad ki riew rangbah kala mih ban trei ia ka surok kaba 1.4 Km ha South West Khasi Hills District hadien ba ka sorkar jylla kala mang ban shna tang 1.2 Km ia ka surok na shnong Nongeitser sha Mawtngam.
Ka KSU kala pynpaw ba ka shnong Mawtngam, South West Khasi Hills District kadei ka shnong ba la bna nam hapoh ka thaiñ bad haki jingthoh kum ka shnong ba shong ba sah u Syiem ialeh laitluid pyrshah iaki dohlieh kata u Sngap Sing Syiem bad kane ka shnong ka jngai kumba 20 Km eiei na ka Mawkyrwat hynrei kadei pat ka shnong bym pat lait kali ban iaid.
Dang ha kane ka snem, kane ka shnong kala ioh iaka mang tyngka napoh ka Border Area Department ban shna ia ka surok na Nongeitser haduh Mawtngam hynrei ka mang tyngka bala ioh ka dang lah ban pynpoi tang kumba 1200 metres eiei (1.2 km). Namar kane ka mang tyngka kan nym lah ban pynpoi surok sha kane ka shnong, ka shnong Mawtngam, ka KSU South West Khasi Hills District bad ka KSU Mawkyrwat Circle lem bad ki katto katne ngut ki riew rangbah kila shim iaki sienjam ban ia synniang ban trei hi iaka surok kaba sah sa 1400 metres eiei (1.4 Km).
“Ngi la shim ia kane ka sienjam ban ia don bynta lang bad ka shnong lem bad ki katto katne ngut ki rangbah hadien ba la ap la slem, ba ka shnong kan ioh pom surok namar kadei kawei ka shnong ba sahnam haka khana pateng kum ka jaka ba ju shong jus ah da u Sngap Sing Syiem, Syiem ka Hima Maharam, uba dei uwei naki nongialeh laitluid pyrshah iaki dohlieh” ula ong.
Kane ka long ruh kum ka nuksa ba ka sorkar ka dei ban phaikhmat lem sha ki thaiñ nongkyndong bad khamtam eh sha kane ka shnong.
Ki nongialam ka KSU kila pynpaw ba ka South West Khasi Hills District ka ju rakhe iaka 30 tarik u Naiwieng kum ka Sngap Syiem Day bad ka dei ruh ka sngi Shuti (District Holiday) hynrei haba peit ia katei ka shnong ka dang duna ha baroh ki liang bad dei ka seng KSU kaba la tei ia u mot sahnam jong une u Syiem la katto katne snem mynshwa.
