Nongstoiñ, Jymmang 1: Ka Federation of Khasi Jaiñtia and Garo People Greater Nongkhnum circle, hynne ka sngi Nyngkong ki la leit ban ïakynduh ïa u Sub Divisional Engineer jong ka BSNL ha Nongstoiñ, ban dawa maramot ia u tower mobile jong ka kompani uba khlem treikam la bun bnai ha ka thain Sangriang.
U bah Ïoanis Ïawlar secretary ka seng haba ïakren bad u nongthoh khubor, u la ong ba ka seng kala dep ban leit ujor ha kine ki bnai ba la dep halor ka jingduh une u tower hynrei namar ka jingbym shym leh eiei satia, kala pynlong syndon ia ka seng ban iakynduh ia u SDE ban dawa maramot noh mardor na ka bynta ka bit ka biang u paidbah ka thain.
U la ong ba ka jingbym treikam jong utei u tower, ka long ka jingduh kaba khraw ïa ki nongpyndonkam mobile phone ha katei ka thaiñ, khamtam ha ki por ba ki don ki kam ba kyrkieh kum haba pyntip ïa ki jingjia bad ki jingdonkam jong ki bapang ba shitom sha ka 108, lane ka jingpluh ïing sha ka Fire Service bad kiwei kiwei.
Utei u nongïalam ka seng u la ong ruh ba ka Nongkhnum ka dei ka jaka jngoh kai kaba ki nongwan shangkai pyngngad ki tuid man la ka sngi. Lada jia kino kino ki jingjia ba kyrkieh, kan shem jingeh ban pyntip wat sha ki para nongshong shnong ba kin wan ban ïarap.
