Nongstoiñ, Jymmang 1: Ban ai jinghikai bad ai jingtip ïa ki samla pule halor kumno ba kin nang ban jied ïa la ka jong ka lawei, ka Nongpyndeng Sport Social & Cultural Club (NSS&CC) lyngba ka jingkyrshan jong ka YESS Meghalaya, Directorate of Sport and Youth Affairs, ha ka sngi saitjaiñ, ka la pynlong ïa ka ‘One Day Career Symposium 2023’.
Ki riewshemphang kiba la ai jingkren ha kane ka sngi ki kynthup ia u Bah Manuel Badwar IIM, Bah Goldenstar Nonglong IIM bad I kong K. Mary Wahlang, NIT kiba la ai jinghikai ïa ki samla pule kumno ba kin jied ïa ki laiñ pule bapher bapher, khnang ba kin lah ban long kiba jop ha ka jingim jong ki.
Ha katei ka sngi, ki la pashat jingmut bad ai ruh ïa ki jinghikai ba kyrpang ha kaba ïadei bad ka Career Guidance, ka jingiaphylliew jingmut ba para marwei (‘one on one session) bad ka panel discussion’.
Ki jingmyntoi ïa kaba ki samla pule ki la ïoh lyngba kane ka One Day Career symposium, ki kynthup halor kumno ban sngewthuh ïa la ka jong ka jinglah bad ka jingsngew tynnad kaba ki don, ka jinghikai kumno ban buh ïa ka thong bad ban jied ïa la ka kong ka career, ka jingai jingtip kumno ban ïoh pule ïa ki kyrdan ba kham shajrong, ka jingjied ïa ki laiñ pule ba thymmai bad ka jingtip halor ki college bad jaka pule ba khambha kiba don hapoh la ka Ri.
Ha katei ka sngi la ïadonlang ruh u Myntri ka shnong Mawkhlam-Nongpyndeng u Bah Balentin Sohlang, u Secretary ka shnong u Bah Tiningstone Byrsat, u President ka NSS&CC u Bah Jovialroy Diengdoh, u Secretary ka NSS&CC u Dr. L. L Mawsor, u nongai buit ka NSS&CC u Bah C. P Byrsat ki samla pule, ki riew rangbah bad kiwei kiwei.
