Shillong, Jymmang 01 : Ka Bharatiya Janata Party (BJP) Meghalaya, hynne ka sngi Nyngkong, kala dawa ia ka Sorkar Jylla ba kan shim rai halor ka ‘Sngi Ot Kyrteng’ ( cut-off- date”) na ka bynta ka jingpyntreikam ia ka Roster System jong ka Job Reservation Policy ka Jylla.
“Ngi kyrshan ia ka hukum ka Iingkashari High Court halor ka cut-off-date hynrei ngim ong ban pyntreikam naduh ki snem bala leit noh ne nangne shakhmat hynrei ngi kwah ba ka Sorkar kan shim ia ka rai. Lada ym lah ka Sorkar, ka dei ban long da ka Iingdorbar Thaw Ain” ong u Convener ka BJP Committee halor ka Roster System bah Himalaya Shangpliang haba iakren bad ki nongthoh khubor.
Ula kdew ia ka hukum bala pynmih da ka Iingkashari Meghalaya High Court ba 3 tarik Iaiong kaba ong “ Ka Iingkashari ka shem ia ka jingonkam ban rah sha ka jingiakren halor ka rister hapoh ka Iingdorbar Thaw Ain ka Jylla”.
Ka Iingkashari kala ong ruh ba kine ki dei ki kam policy kaba bha ban ieh ha ka Iingdorbar Thaw Ain bad ki bor Synshar ha ka Sorkar bad hadien ba kila shim ia ka nongrim, kan sa long kaba plie lad ia ki nongshongshnong ba shah ktah ba kin buh jingkylli halor ka jingtreikam kat kum ki kyndon ka ain.
Haba kylli, une u MLA barim ka Mawsynram ula ong ba ai ba ka Sorkar ha ka kyrdan jong ka bad ka Kynhun Myntri kan shim rai halor kane ka kam.
Ula iengskhem ruh ba ka BJP kam don eiei ban ong halor ka jingdawa ban bishar thymmai ia ka State Reservation Policy bad ong “Ngim kwah ktah ia ka kam ba iadei bad ka Policy. Ngi kwah ban kren tang halor ka hukum ka Iingkashari ba iadei bad ka Roster”.
Ka Committee halor ka Roster System kala dep shong jingialang haduh arsien. U Bah Shangpliang ula pyntip ba ka kynhun ki nongiasaid ain bala khlieh da u SP Mahanta, kala ai jingiarap ia ka Committee da kaba ai jingmut halor ki ain.
“Ka Committee kala shim ia ki katto katne ki jingai jingmut ia kiba ngin sa rah ynda u Myntri Rangbah ka Jylla u khot ia ngi sha ka All Party Meeting” ula ong haba bynrap “Ia ki jingtip ba bniah halor kane ngim kwah satia ban iathuh hangne namar ngi kwah ban buh na ka bynta ka jingiatai ha ka miej ynda la iakynduh baroh ki seng sain pyrthei”.
Shuwa kane, u President ka BJP-Meghalaya Bah Ernest Mawrie ula pyntip ba ka Committee kan sa aiti ia ka kaiphod halor ka Roster System. “Ngin sa shong bishar ia ka kaiphod bad ngin sa rah hapoh ka jingialang jong ka MDA” ula ong.
