Shillong, Jymmang 01 : U President ka BJP Meghalaya u Bah Ernest Mawrie hynne ka sngi Nyngkong, ula pynpaw ba u ieh beit ha ki nongialam kiba hakhlieh duh jong ka seng BJP ban shim ia ka rai la yn dang bteng ne em ban shakri kum u President ka BJP ha Jylla Meghalaya.
“Nga la pyndep ha kaban trei mynta 3 snem, hynrei ba ngan bteng ne ban sangeh ban trei kum u President, dei ban rai da ki nongialam kiba ha khlieh jong ka seng” ong u Bah Mawrie haba jubab ia ka jingkren u MLA ka BJP Bah AL Hek ba ka don ka jingthmu ban weng noh ia u Bah Mawrie kum u President ka BJP ka jylla.
U Bah Mawrie ula pyntip ba u Myntri uba khmih ia ka tnad iada ri u Rajnath Singh ula pynbna ha ka jingilang jong ka National Executive Committee ha Delhi ha ka 13 tarik u Kyllalyngkot 2023 ba ka samoi treikam jongu National President JP Nadda la pynjlan haduh ka 24 tarik u Jylliew 2024.
“Katba ki nongialam kiba ha khliehduh kim pat pynbna ia ka tarik ban pynlong iaka elekshon jong u National President, ngim pat lah ban pynlong iaka elekshon. U Bah Hek u lah bakla palat ha kaban ai ia katei ka jingkren,” ong u Bah Mawrie.
“Lada phi kynmaw u Bah AL Hek ula long u President ka BJP Meghalaya naduh u snem 2003 haduh 2006 kumta ka samoi treikam jong u President ka long 3 snem bad kam dei satia 2 snem kumba la ong u Bah Hek” ong u Bah Mawrie.
Haba kylli la un shim ia ka jingkitkhlieh halor ka jingbym lah ka BJP ban leh bha ha ka MLA Election kaba la dep, u Bah Mawrie ula ong, “Ngi la leh bah bad iakhun ha baroh 60 tylli ki Constituency bad ka jingioh vote ka seng ruh kala kiew.Baroh ki kyrtong kila trei shitom ban jop hynrei ka elekshon ka dei ka elekshon”.
Ula ong ba ka seng kala lah ban jop tang ha ki 2 tylli ki Constituency ka dei namar ba ki paidbah ka jylla kila jied ia kiwei pat ki seng sain pyrthei.
“Ngi hap ban trei shitom shuh shuh ha Meghalaya hynrei ki paidbah kin sa babe ba kim shym la jied iaka BJP namar peit ia ki kam pynroi kiba jia hapoh ka jylla Assam,” ula ong.
U Bah Mawrie ula kyntait ban kubur ba kala don ka jingiapait iapra hapoh ka seng BJP bad ula ong “Baroh ki don iala ka jingangnud bad ngin ym lah ban khang ia kata”.
Ula ong, ba ka seng kan sa bthah ia u MLA ka Pynthorumkhrah ba ym dei ban kren pyrshah ia ka seng ha ki lad pathai khubor.
“Ha kine ki khyndiat sngi, ka seng kan sa ai iaka jingbthah ba yn ym lah ban leit sha ki lad pathai khubor ban kren pyrshah ia ka seng. Kum u myntri sorkar u dei ban kren shphang ka tnad kaba u khmih bad kiei ki kam pynroi kiba yn wanrah lyngba ka tnad na ka bynta ka jylla, katba na ka bynta ka seng, kadei ka seng hi kaban shim ia ka rai” ong u Bah Mawrie.
U Bah Mawrie ula ong ba ka seng ka dang ap ia ka jingbthah jong ki nongialam ba ha khkiehduh jongka seng la yn donkam ban ai show cause notice ia u myntri sorkar.
