Shillong, Iaiong 29: Ka skulbah ICFAI Meghalaya hynne ka sngi kala pynlong iaka Convocation ba 4 ban pynkupburom iaki samla pule jong u snem 2022 hapoh ka Tura Campus.
Ha kane ka sngi, 544 ngut ki samla pule Graduates kila ioh iaki Degree bad napdeng kine 6 ngut ki samla pule kila ioh iaka khusnam General Proficiency Awards, 15 ngut kila ioh Gold Medal hadien ba kila wan shaka kyrdan First Position bad 18 ngut ki samla kila ioh Silver Medals hadien ba kila ioh ka kyrdan Second Position.
Ia kane ka jingpynkup burom ia ki samla pule la pynshongkun da ka jingiadon ryngkat u Myntri Rangbaha ka jylla Conrad K. Sangma uba la ai khublei iaki samla kiba la pyndep iaki jingpule bad ula kitbot ruh iaki naka bynta ki jingpule ba shakhmat.
Naka liang u Chancellor ka skulbah ICFAI U Lt. General (Dr.) Arvinder Singh Lambha haka jingkren ula kyntu iaki samla pule ban nang trei shitom khnang ba kin lah ban poi shuh shuh shakhmat ha ki jingpule bad hala ki jingim.
Ka Vice Chancellor Dr. Alicia Gatphoh kala kren halor ka jinglah ka skulbah ban sam jingnang jingstad iaki samla pule ka jylla bad na kiwei ki jylla ka ri India kiba la wan ban pule ha kane ka skulbah.
Kala ong ba ka jingwan shim bynta u Myntri Rangbah ka jylla kan nang ai mynsiem iaki samla ban nang trei shitom ha ki jingpule.
