Shillong , Iaiong 27: U Myntri Sorkar uba khmih ia ka tnad Food, Civil Supplies bad Consumer Affairs u Bah Comingone Ymbon, hynne ka sngi Palei, ula lum ia ka jingialang ha Conference Hall jongka Secretariat ban khmih bniah ia ka rukom treikam jong katei ka tnad sorkar ha ka jylla.
Ha katei ka jingialang la wan ban iashimbynta da ki ophisar jong ka tnad na ki District bad ki Sub Divisional Office, ha kaba la iatai sani bad khmih bniah ia ki sienjam kiba la shim ha kaba iadei bad ka One Nation One Ration Card (ONORC), Aadhaar Seeding, electronic Point-of-Sale (e-POS), ka jingtip ia baroh FPS GPS Coordinates ha ka jingiaid jingieng ki kali kiba kit ia u khaw rashon ha kylleng ki bynta jongka jylla Meghalaya bad kiwei kiwei.
Ia ka One Nation One Ration Card la pyntreikam ha ka jylla ban pynthikna ba ki nongioh jingmyntoi lyngba ka NFSA kin shim ia u khaw rashon na ki dukan rashon kiba don ha ka jylla ne shabar ka jylla tang lada kila pyniasoh lang ia u Aadhaar number jongki ha ka thup jong ka PDS Database.
Ban pynthikna ba kan don ka jingkhuid jingsuba bad ka jingai ia ka jingkhein jingdiah kaba paka, la buh iaka electronic Point-of-Sale ha man la ki dukan rashon ha kylleng jong ka jylla.
U Myntri Sorkar ula kyntu ia ki ophisar ba kin peit ba ki dukan sam rashon kidei ban pyntreikam ia ki ePOS machine khnang ba man la ki nongioh jingmyntoi kin ioh ia ka hok kaba kidei ban ioh khlem kano kano ka jingduna.
U Bah Comingone, ula iaroh ruh iaka tnad sorkar halor ka jinglah ban sdang ia katei ka projek ban tip thik pa thik iaka jingiaid jingieng jong ki kali kit khaw rashon khnang ba yn lah ban tehlakam ba kan ym don ka jingleit kit sha kiwei pat ki jaka ha ki sngi ban wan.
Lah ban kdew ba ka tnad Food, Civil Supplies & Consumer Affairs ryngkat ka jingiatreilang bad ka United Nations World Food Programme kila sdang ruh ban pyntreikam ia ki kor teknoloji bad na ka liang u Myntri ula kyntu ia baroh kiba don bynta ba kidei ban shimkhia lang ban pynlong iaka Public Distribution System kaba khlain bad kaba khuid ba suba.
