Shillong, Iaiong 26: Ka Myntri ka tnat ka koit ka khiah kong Ampareen Lyngdoh hynne ka sngi Balang, kala iathuh ba ka jingtei iaka Tura Medical College kala iaid shaid shaid mynta.
“Haduh mynta kumba 45% ki jingtei ia ka Tura Medical College kila dep bad kila mih ki jingeh hynrei ka tnat kala iatreilang bad kiwei ki Hospital ba marjan ban pynthikna ba ka jingtei ia kane ka jaka sumar ba 450 jingthiah kan iaid beit iaid ryntih katkum ki kyndon ka MCI” ong i kong Ampareen.
Ka kong Ampareen kala iathuh ruh ba ki don katto katne ki jingeh haba iadei bad ka jingioh pisa naka bynta ban pyniaid shakhmat iaki kam hynrei naka liang ka tnat kala dep ban pynbeit halor kane ruh.
Ka Myntri kala pyntip ba shen kan sa leit jurip sha kane ka jingtei. “Ia ka ba mynta nga dang ap ban kut ka jingtreikam ka model code of conduct (MCC) naka bynta ban ioh leit jurip iaki kam haba iadei bad ka jingpyntrei iaka Tura medical college”.
Haba iadei bad ka Shillong Medical College, ka kong Ampareen kala iathuh ba ka sorkar jylla ka dang pynkhreh ia ki jingdonkam bad kane ka kam kan hap ban leit sa sha ka jingialang jong ka Kynhun Myntri.
“Ngin donkam daka jingthoh jong ka kynhun Myntri halor ka song pisa ba donkam bad hooid ka Shillong Medical College kan sa kylla noh na kaei kaba la tyrwa mynshuwa” ila ong haba bynrap “Ngi lah ban tyrwa da ka PPP mode kumba tyrwa mynshuwa hynrei kam mut eh ha Shillong hynrei ha kiwei pat ki jaka jong kane ka thain hynrei baroh kine kiei kiei ki dang don hapdeng ka jingpynkhreh bad kam bha ia nga ban iathuh lut ia kiei kiei baroh”.
Haba kylli ka kong Ampareen kala ong ba ka tnat ka kwah ban pyndep noh ia kane ka jingtyrwa ha ka por kaba la buh bad iaka ba mynta ka jingtei ha Garo Hills kala iaid shakhmat hynrei naka liang ka sorkar jylla ka kwah ruh ban don ha Khasi lane ha Ri-Bhoi hynrei iaka ba mynta ka tnat kam pat lah ban iathuh lut ia kiei kiei baroh namar ka kam ka dang don hapdeng ka jingiakren.
