Shillong, Iaiong 26: Ka KSU South West Khasi Hills District kala ai dorkhas ha ka Myntri ka Koit ka Khiah Kong Ampareen Lyngdoh ba pynpaw iaka jingeh jong ki paidbah ha kaba iadei ba ka koit ka khiah hapoh ka South West Khasi Hills District bad Mawsynram C&RD Block.
Katkum ka dorkhas kaba la aiti da u President samla Forwardman Nongrem bad u General Secretary u samla Jiedskhem Nongsiej kila pynpaw ba ka jingplie iaka Hospital 100 jingthiah (100 bedded CHC) ha u Nohprah 2022 kala pynkmen iaki paitbah ka South West Khasi Hills District, hynrei ka seng kala lap shibun ki jingduna ha kane ka Hospital khamtam hapoh ka Radiology la lap ba ka dang donkam shuh shuh iaki nongtrei kiba peit ia ka X -Ray bad ban wanrah iaki machine.
Kila pynpaw ruh ia ka jingdonkam kum ki Surgeon, ki tiar ki tar ban pynbiang hapoh ka Intensive Care Unit ka bym pat don eiei mynta.
“Ka Hospital kam don ia u Medical Supritendent ba pura bad ka dang duna bha ha ka jingdon jongki nongtrei bad dang donkam ban thung ia ki nongtrei ha ka Outpatient Department (OPD), ban pynbun shuh shuh iaki Staff Nurse, ia ki Assistant ha ka Pharmacy, Head Nurse bad kiwei kiwei” ong ka dorkhas.
Ka KSU kala kyntu ruh ban thung shuh shuh iaki Driver namar ka Hospital ka dang don tang uwei u nongniah kali, ban thung shuh shuh iaki nongap (Security) ha ka Hospital bad kala kyntu ban pynbun iaki kali kit nongpang (Ambulance).
“Ka long kaei kaei kaba sngewsih ba kane ka Hospital kam pat don ki tiar ki tar hapoh ka Operation Theater Department kaba la i donkam ban buh bad wanrah noh kham kyrkieh ia ki tiar ki tar. Ka Hospital kam pat don ruh iaki Generator ban pynbit pynbiang iaki jingdonkam” la pynpaw ka KSU.
Ka KSU kala dawa ruh ia ka Sorkar ba kan mang pisa ha kaban shna noh iaka Office jong u District Medical and Health Officer (DMHO) uba trei mynta n aka Quarter jong ki Doktor bad ki Nongtrei ka CHC.
Ka KSU kala dawa ruh ia ka Sorkar ban pynbiang ia ki jingdonkam hapoh ka Wahkaji PHC naduh ki dawai dashin, ban thung sa uwei u Doctor, ban pynbiang iaki nongtrei kum ki Pharmacist, ka jingbym treikam ka Ambulance kaba la don lypa bad kiwei kiwei.
Kila pynpaw ruh iaka jingdonkam ban plie bad pyntreikam noh iaki Health Sub Centre ba la dep shna ha Mawthong bad Mawkhyrwang.
Ha kaba iadei bad ka Mawsynram C&RD Block, ka seng KSU kala dawa ban pynbiang iaki jingdonkam hapoh ka Mawsynram CHC kiba kynthup iaka jingbym biang ka um, ka jingdonkam ban maramot bad ban pynbha iaka building bad ban ai rong.
“Ngi la lap ba kane ka CHC ka donkam ia ki tiar kum ka Ultrasound bad X-ray bad ka donkam ban don sa kawei ka Ambulance” kila ong haba pyntip ba ka KSU ka kyntu iaka sorkar ba kadei ban shimkhia halor kine ki jingduna na ka bynta ka jingbit jingbiang jongki nongshongshnong hapoh ka Mawsynram C&RD Block.
Kila kyrpad ruh ban buh sa kawei ka Health Sub Centre ha shnong Mawhiang, khamtam haba ka thain Sawsymper ba kaba kynthup iaki 16 tylli ki shnong, ha shnong Jyllep kaba la don lypa ka jaka bala dep iasoi soskular, ban kyntiew kyrdan ia ka Dangar PHC sha ka CHC bad kiwei kiwei.
