Guwahati, Iaiong 26: Ka Assam BJP Mahila Morch mynta ka sngi Balang ka la ujor da ka FIR pyrshah ia u nongialam ba la rim ka seng Congress u Rana Goswami halor ka jingkynnoh kren bein bad kynthoh pyrshah ia ki nongtrei kam bhalang jong ka seng BJP kiba dei ki kynthei.Ia kane ka jingujor la ujor hapoh Dispur police station mynta ka sngi Balang.
Ha katei ka jingujor ba la ujor da ka nongaiktien ka BJP ka Janki Khound la kynnoh ba u Goswami u la pynpaw ba ki nongtrei kam bhalang jong ka BJP ki ia shong ia sah ryngkat bad kiwei pat ki briew wat haba ki don la ki jong ki kurim.
Kane ka jingjia ka la paw penryngkew hadien ba u Rana Goswami u la pynmih ia ki katto katne ki jingkren ha ka jingialang bad ki lad pathai khubor ha kaba u la kynnoh ba ki kynthei kim don jingshngain hapoh ka seng BJP.
Nalor kata la kynnoh ruh ba u Goswami u la ong ba ki kynthei hapoh ka seng BJP ki don ia ka jingiadei kam ba buhrieh bad ki shynrang.
Ha ka 24 tarik mynta u bnai u Rana Goswami uba dei u Working President ka APCC u la aijingkren ha ka jingialang bad ki lad pathai khubor ha ka sor rit Sivsagar bad kren bein da ka jingthmu khnang, pynjah burom bad pynbitar ia ki nongtrei kynthei jong ka sneg Bharatiya Janata Party (BJP) da kaba ong “ki nongtrei kynthei hapoh ka seng BJP ki la ia shong ia sah ryngkat bad kiwei pat ki briew wat haba ki la don la ki jong ki kurim,” kata nalor ki katto katne ki kiwei pat ki kyntien kiba jakhlia.
“Ngin pynpaw pyrshah ia katei ka jingkren jong u Goswami bad dawa ba dei ban kem ia u namar kine ki jingkynthoh pyrshah ia ki nongtrei kynthei jong ka BJP.Ki kynthei barabor ki la ngat ha ki jingshah kren bein hapoh ka seng Congress.Dang shen ngi la iohi kumno ba ka president ka Assam Youth Congress ka Angkita Dutta ka la shah kren beain ha ki nongialam ka Congress,” ong ka Juri Sharma Bordoloi, kaba dei ka nongialam ba la rim jong ka seng BJP.
