Imphal, Iaiong 25 : Ki pulit ka Manipur ki la ioh ban kem noh ia uwei u briew uba donkti ha ki kam khaii drok beain sha ki bynta ki jylla ba marjan naduh kine ki 15 bnai ba la dep na ki bynta ka jylla bad ioh kurup haduh 3.5 kilo u drok heroin uba paka uba shongdor haduh kumba T. 30 klur ha ki jaka iew beain ka pyrthei.
Ki pulit ki la ioh ruh ban kurup noh ia kawei ka kali kaba don ia u registration number na ka jylla West Bengal, kawei ka mobile bad katto katne ki kot ki sla. Laingut kiwei pat kiba ia don ryngkat lang ki la ioh ban phet krad noh na ka jaka kaba ki pulit ki la pynlong ka jingkhynra ha ki bynta shatei ka sorbah Imphal ka Manipur.
Hadien ba la ioh ia ka jingtip kaba bniah, ka kynhun ki pulit na ka thain Imphal West District police station ka Manipur ki la pynlong ka jingkhynra bad lapdien ia kawei ka kali kaba i shan khmat ha ki bynta jong ka Sanglakpam kumba 4 km na ka sorbah Imphal.
Ki pulit hadien ba ki la pynlong ka jingtalasi ki la ioh ban kurup ia u drok heroin uba don 3.51 kilo ia uba la buhrieh bha hapoh ki song sabon, ha kaba ki la kem noh ruh ia u briew uba donkti ia uba la tip kyrteng kum u Md Samir 23 snem rta uba dei na ka shnong Lilong ka Manipur.
Ha ka jingtohkit, ki pulit ki la ioh jingtip ba ia une u drok la thmu ban shalan beain shapoh West Bengal hadien ba ki la ioh ban kurup noh na ka lynti surok NH 102 hapdeng ka Imphal-Dimapur.
