Guwahati, Iaiong 24: Hadien ka jingiasoi soskular ka ban sah histori hapdeng ka Assam bad ka Arunachal Pradesh na ka bynta ban weng ia ki jingiakynad pud kaba la ki phewtylli ki snem, na ka liang ka Working Committee (WC) jong ka Naga National Political Groups (NNPGs) ka la dawa na u Myntri Rangbah (CM) Neiphiu Rio ba un weng noh na ka Memorandum of Understanding (MoU) bad ka Assam halor ki kynrum kynram kiba mih lyngba ka jingbym lah ia pynbeit ha kaba iadei bad ka kam iakajia pud.
Ka NNPGs ka la dawa na u Neiphiu Rio ba un weng noh na kano kano ka jingpyrshang kaba iadei bad ka jingthmu ban tih marpohkhyndew ia kiba la aijingiada katkum ka histori bad halor ki jingiapynbeit kam sain hima jong ki Naga, kaba long ruh kaba beain bad ka bym lah ban pdiang na ka bynta ki kynhun kiba ia don bynta.
Ka WC ka NNPGs ka la pynpaw ba ka don ruh ka jingsngew buhkhoh namar ka sorkar kaba duna ki liang pyrshah ha Nagaland ka la nang pynjur halor ki kam synshar leh donbor.
Ha kajuh ka por ka la kyntu ia ki paidbah ba kin phaikhmat lada ia ki hok kiba iadei bad ki kam sain hima bad kiba katkum ka histori la shu set noh hapoh ka synduk pyndaitthah, bad ruh ban buh jingma ia ka imlang ka sahlang lyngba ka jingbym iahap haba pynshong nongrim ha kaba iadei bad ka ioh ka kot.
Na ka liang ka NNPGs ka la pynpaw ba ka histori jong ki Naga ka la kdew shai kdar halor kane ka mat bad ba ka ngeit ba ka jingshim rai ha kaba iadei bad ka kam ia pynbeit pud hapdeng ka Nagaland bad ka Assam ka dei ban long na ka bynta ka jingbha lang jong baroh ki arliang mamla.
Lah ban kdew ba na ka liang u CM ka Assam bad ka Nagaland, Himanta Biswa Sarma bad u Neiphiu Rio ki la mynjur halor ki mat ban pyniaid shakhmat ha kaba iadei bad ki kam tih mar umphniang ha ki jaka khappud kiba don hapdeng ka jingiakynad na ka bynta ki jingmyntoi kiba iadei bad ka ioh ka kot jong baroh ki ar jylla.
