Guwahati, Iaiong 24: Hynnin ka sngi U Blei ki pulit ka Assam ki la kyntu ia u president ka Indian Youth Congress (IYC) u Srinivas B.V. ban wan mih ha ka 2 tarik u Jymmang u ban wan ban kylli jingkylli ha kaba iadei bad ki jingkynnoh kam thombor ki jong u pyrshah ia ka Angkita Dutta.
Ka Angkita Dutta ka la ujor sha ki bor pulit pyrshah ia u Srinivas BV halor ka jingkynnoh kam banbor bad ktahkti.Hadien kane ka jingujor bad hadien ka jingpynpaw lyngba ki social media pyrshah ia u Srinivas BV, ka Dutta ka la shah beh noh na ka party Congress halor ki jingkynnoh ialeh pyrshah seng.
U Moitrayee Deka, Additional Deputy Commissioner of Police (East Guwahati), Guwahati Police Commissionerate, Kamrup (Metro) ha ka notis u la ong, “Katkum ka bor ba la pynkhamti hapoh ki kyndon sub-section (1) jong ka section 41A CPC, Nga pyntip sha phi ba ha ka por ka jingpynlong ia ka jingtohkit halor ka case hapoh Dispur Police Station ki don ki nongrim kiba shongnia ban kylli jingkylli iaphii khnang ban lap ia ki jingshisha da kaba phone wan mih ha ka 02/05/2023 ha ka por 11 baje mynstep. Katei ka notis ka ong ruh, “Phi dei ban bud ryntih ha kaba iadei bad kane ka hukum. Phin ym leh shuh ia ki kam pynkhein ain hadien habid. Phin ym pynduh ia ki sakhi satar kiba iadei bad kane ka case la ha kano kano ka rukom. Phi dei ban wan mih hakhmat ka iingbishar lada donkam lane lada ioh pdiang ia ka hukum.””Phin ia don lang ha ka jingtohkit halor kane ka case lada donkam bad ban ai ruh ka jingiatreilang ha ka jingtohkit.Phin hap ban phla lut ia ki jingshisha baroh khlem da buhrieh ia kano kano ka bynta.”
“Ki pulit ki Assam ki la leh katkum ba shong ka ain.Mynta ki dang pynlong ka jingtohkit halor ka jingujor da ka nongtrei jong ka Seng Congress pyrshah ia utei uba la shah kynnoh donkti hapoh ki kyndon ain Section 354 jong ka IPC.Kam long kaba dei ban tei pop pyrshah ia nga halor ka jingshngain na ka bynta ki nongtrei kiba dei ki kynthei hapoh jong ka party congress.Sngewbha aijingmut ia uba shah kynnoh donkti ba un ai ka jingiatreilang halor ka jingtohkit,” pynpaw u CM ka Assam u Himanta Biswa Sarma.
Ka kynhun ki pulit na Assam ki la phah ia katei ka notis pyrshah ia u Srinivas BV shapoh ka iingsah jong u ha Bengaluru, kata ha ryngkat ka hukum ba kano kano ka jingbym bud ryntih ia kane kan lam sha ka jingshah kem.
