Shillong, Iaiong 24 : Ki lai tylli ki Autonomous District Council (ADC) ka Jylla, kila shim ia ka rai ban mynjur lang da ka resolution ha kaban pyrshah ia ka jingthmu jong ka Sorkar Pdeng ban pyntreikam ia ka Uniform Civil Code (UCC) hapoh ka Jylla.
Ia kane ka rai la shim ha ka jingialang jong ki lai ngut ki Chief Executive Member (CEM) ki ADC ka Jylla-ka Khasi Hills Autonomous District Council (KHADC), Jaintia Hills Autonomous District Council (JHADC) bad ka Garo Hills Autonomous District Council (GHADC), ba long hynne ka sngi Nyngkong ha nongbah Shillong.
“Ngi la shim rai da kawei ka jingmut ba ngin mynjur lang da ka resolution ba ngin pyrshah ia ka jing pyntreikam ia ka UCC ha ki jaka ka Sixth Schedule bad ngin sa mynjur ia kane ka Resolution hala ki jong ki Council shen” ong u Bah Titosstarwell Chyne CEM ka KHADC haba iakren bad ki nongthoh khubor hadien ka jingialang.
Ka UCC ka dei ka jingtyrwa ban shna bad pyntreikam ia ka ain shimet jong ki Nongshongshnong ka ban treikam kumjuh ia baroh ki nongshongshnong.
Ula ong ba ka jingialang kala iatai sani halor ka jingthmu jong ka Sorkar Pdeng ban wanrah ia ka UCC Bull hapoh ka Ri bad bynrao ba “Ngi sngew ba ka UCC kan ktah beit ia ka bor bad ka jingtreikam jong ki ADC khamtam halor ka riti dustur, ki jingleh tynrai, ki Shnong ki thaw kumjuh”.
Haba kylli la ki ADC kin khot ia ki Dorbar Kyrpang halor kane ka kam, u Bah Titos ula ong ba la kyrmen skhem ban sa khot noh ia ka Dorbar Kyrpang ha u bnai ban wan namar ki kwah ban pynsted wut wut ia ka kam.
“Ki don shibun ki jingeh kumba nga la ong ba kan (UCC) sa ktah ia ka riti dustur kum ka kam iakyntiew kurim. Shisien bala pyntreikam ia ka UCC, ngin sa don ia ka Uniform Marriage System (rukom iakyntiew kurim ba kumjuh) hynrei ha ka dustur jong ngi, ngi iapher bha, kumta ka jingiakyntiew kurim ha ka niam bad ka riti dustur kan sa shah ktah. Kum ki Scheduled Tribe, ngi sngew ba ka jingpyntreikam ia ka UCC ka dei ka bym lah ban pdiang hapoh ka Jylla” ula ong.
Nalor kane, une u Khliehduh ka KHADC ula ong ba ka Sorkar Jylla ruh kan hap ban iaid ha kajuh ka lynti shisha ba ki lai tylli ki ADC kila mynjur ia ka resolution kumba long ha ka kam jong ka Citizenship Amendment Act.
“….ka CAA ka dei kaba la pyllait na ki Scheduled Areas, nga sngew ba ka UCC ruh kam dei ban treikam na ki jaka Sixth Schedule. Namar kata, ngi dawa ban pyllait noh ia ka UCC na ki jaka ba hap hapoh ka Sixth Schedule” ula ong.
