Shillong, Iaiong 24 : Ki shipai Indian Army hynne ka sngi Nyngkong, kila rakhe ia ka jingdap 60 snem ka jingshakri ia ka Ri India ha Indian Army Headquarter ka 101 Area, Shillong.
Kane ka jingrakhe kala sdang da ka jingkynmaw burom ia ki riewshlur ha ka Shillong War Memorial, Rhino, Prerna Sthal, da u Lieutenant General RP Kalita, General Officer Commanding in Chief (GOC-in-C) ka Eastern Command, Indian Army.
U Major General RK Jha, Officiating General Officer Commanding (GOC) 101 Area bad baroh ki shipai ka 101 Headquarter kila kynmaw burom ia kito kiba la phla iala ka jingim na ka bynta ka Ri.
Ka 101 Communication Zone ba ju khot mynshuwa, ka dei kaba la pynieng ha ka jinghiar thma ka China ha ka 22 tarik Iaiong 1963 ba kan iarap ai ia ki jingtip sha baroh ki len shipai ba don ha ka thain Shatei Lam Mihngi.
Kane ka ktem shipai kala iashimbynta ruh ha ka jingkhynra kaikhlaw ha Mizoram ha u snem 1966-69 bad ha ka thma 1971, ka 101 HQ kala iashimbynta ha ka Sylhet bad Mymensing Operation kaba hap mynshuwa sha ka East Pakistan (mynta Bangladesh) bad ka dei kaba nyngkong eh ban poi sha Dacca ha ka step 16 tarik Nohprah 1971 kaba lam sha ka jingpyndem wait jong ka Pakistan ha kane hi ka janmiet, bad kaba pynioh ia ka kyrteng “First in Dacca”.
U Major General RK Jha haba ai ka jingkren ha kane ka jingrakhe, ula ai ka jingiaroh ia baroh ki shipai kiba la pynbteng shakhmat ia ka jingshakri ia ka Ri.
Ban rakhe ia kane ka jingdap 60 snem ka jingshakri ia ka Ri, une u Heh Shipai ula pyllait paidbah ruh ia ka Special Cover bad Stamp kum shibynta jong kane ka jingrakhe nalor ka jingplie ia u mawsahnam jong u Major General Gurbaksh Singh Gill bad Major General Gandharv Nagra, kiba dei ki GOC ka 101 Area ha ka thma 1971, kiba la iarap ban pynioh ia ka jingjop ia ki shipai ka Ri ha kane ka thma.
U Lt Gen RP Kalita ula kaweh ia ka lama pynkut jong ka “Rhino Riders” Motorcycle Rally bala pynlong da ka Headquarter ka 101 Area. Ia kane ka rally la kawang lama sdang ha ka 9 tarik Iaiong 2023 da u Lat ka Jylla u Phagu Chauhan na Rhino Training Complex Shillong.
Kane ka kynhun niah thuk thuk kala iaid na Meghalaya sha Assam, Mizoram, Manipur, Nagaland bad Arunachal Pradesh kum shibynta ban rakhe ia u snem ‘Azadi ka Amrit Mohatsav’.
