Shillong Iaiong 23: Hadien ba ki khubor kila saphriang ba ki MLA ka seng kin leit pyniasoh noh sha ka NPP, ki nongkyrshan ka PDF kila pynpaw ba kin ym leit bud tynneng ia ki MLA jongki hynrei kin buh da ki kyndon.
U General Secretary ka PDF Mawkynrew Zonal Committee u bah Dengbok Kurkalang, ula ong, “Lada poi u pud haduh ban pynduh ia ka seng PDF ban rung noh sha ka seng NPP, ym dei ban shu leit bud beit, hynrei dei ban don ruh iaki kyndon.
Ka PDF ka don ar ngut ki MLA kiba kynthup ia u bah Gavin M Mylliem na Sohra constituency bad u bah Banteidor Lyngdoh na Mawkynrew Constituency.
Kine ki nongialam ka PDF kila pynpaw ba kala don ka jingkhroh jong ka seng NPP ban pyniasoh noh bad ki haba pyntip ba ka jingiakren ka dang iaid shakhmat.
U Bah Kurkalang ula ong, watla kam pat don kano kano ka jingialang ban iakren ia kane ka kam, hynrei kan ym don ia kano kano ka jingpyrshah ban leit rung sha ka seng NPP lada ki nongialam ka PDF ki sngew ba dei ban shim ia kum katei ka rai.
“Lada kila rai ban leit iasoh noh bad ka NPP, ngim dei ban shu shah ba kin leit pyniasoh suk hynrei ngi donkam ban buh ryngkat bad ki kyndon” ong u bah Kurkalang.
Ula pynshai ruh ba ha Mawkynrew Constituency ki paidbah kim shym la jied ia ka seng hynrei kila jied ia u briew bad ka jingjop u kyrtong kam shong ha ka seng hynrei ka shong ha ka jinglah ka jongu kum u briew.
