Dibrugarh, Iaiong 23: U heh nongialam ka kynhun kieng atiar ‘Waris Punjab De’ uba don hapdeng ka jingphetrieh, u Amritpal Singh u la shah kem noh bad shah pynkynriah shapoh Dibrugarh Central jail mynta ka sngi U Blei hapdeng ka jingpyrkhing pahara.
La pynkynriah is u Singh da ka liengsuin na Bhatinda.Ka kynhun ki 12 tylli ki kali pulit ki la synran ia u Amritpal Singh shapoh Dibrugarh Central Jail.
Katkum ki khubor, u Amritpal Singh u la shah kem noh na ka shmong Rhode ka ba don ha Moga, Punjab hynne ka step sngi U Blei.
Ki pulit ka Punjab ki la kem noh ia u Amritpal Singh hadien ba u la pyndem noh ia lade sha ki bor pulit ha Gurdwara Janam Asthan Sant Khalsa ha ka shmong Rode. La kem noh ia u hapoh ki kyndon ain National Security Act (NSA).
Ha ka 21 tarik mynta u bnai, ka kurim u Amritpal Singh ka Kirandeep Kaur ka la shah bat noh shwa ba kan kiew hapoh ka liengsuin sha London napoh Sri Guru Ram Dass International Airport ha ka ba la pynphai pat sha ka iingsah u kurim jong ka ha Jellupur Khera ha Amritsar.
Hashwa ba un shah kem noh, u Amritpal Singh u la aijingkren hapoh Gurdwara ha ka shnong Rode ha Moga district hashwa ba un shah kem noh. La pynngat ia u ha kumba hynriew tylli ki case hapoh Amritsar Rural bad ha Jalandhar Rural police districts.
U Amritpal u la don hapdeng ka jingphetrieh naduh ka 18 tarik u bnai Lber ba la dep, kata ha ka sngi ba ki bor pulit ki la pynlong ka jingkhynra ka ba jur ban kem ia u bad ia ki briew ki jong u ha Punjab.
Khyndai ngut kiwei pat ki dkhot nongkyrshan Khalistan na ka kynhun ‘Waris Punjab De’ mynta ki don hapdeng ka jingshah set phatok hapoh Dibrugarh, kata hadien ba baroh ki la shah kem noh na Punjab hadien katei ka jingkhynra borbah da ki pulit ka jylla ban ioh kem ia u Amritpal Singh uba dei u heh nongialam ka kynhun ‘Waris Punjab De’.
U Daljeet Singh Kalsi, Papalpreet Singh, Kulwant Singh Dhaliwal, Varinder Singh Johal, Gurmeet Singh Bukkanwala, Harjit Singh, Bhagwant Singh, Basant Singh bad u Gurinderpal Singh Aujla ki la shah set mynta hapoh Dibrugarh Central Jail hapoh ki kyndon ain National Security Act (NSA).
Ha ka 20 tarik mynta u bnai, ki dkhot ka longiing u Daljit Singh Kalsi ki la wan poi ha Dibrugarh Central jail bad iakynduh ia u Daljit una la shah set hapoh Dibrugarh Central jail naduh ka 19 tarik u Lber 2023.
Ka kurim u Daljit Kalsi ka Narinder Kaur (Neeru Kalsi) ka la iakynduh ruh ia la u jong u kurim ha ryngkat u khun jong ka u Simarjeet Kalsi (Sunny) hapoh Dibrugarh Central Jail.
Ha ka 19 tarik mynta u bnai, ka kynhun jong ki San ngut ki dkhot ka Advisory board ka NSA ki la wan poi sha Dibrugarh na Punjab bad iakynduh ia kitei ki khyndai ngut ki dkhot ba la shah kem jong ka kynhun ‘Waris Punjab De’.
