Shillong Iaiong 23: U Kyrtong ka National People’s Party (NPP) uban iakhun iaka MLA Election na Sohiong Constituency bah Samlin Malngiang, hynne ka sngi Saitjaiñ ula ong ba u dei u khun khatduh jong ka seng NPP bad lada ki paidbah ki jied ia u kum u MLA yn shu lehroh bad khroh beit iaka sorkar ban tuid ka pisa bad ka skhim sha Sohiong kum ka Kshaid.
U Bah Samlin ula kren ia katei ha ka jingialang paidbah kaba la long ha ka shnong Weilyngkut kaba hap ha Sohiong Constituency.
“Nga dei u khun khatduh ha ka seng NPP bad ynda phi la jied ianga kum u MLA, ynda la poi ha Secretariat ngan lehroh ia ka sorkar bad ngan shu khroh beit, ha kaba ka pisa bad ka skhim ngin tong na Secretariat bad kan tuid sha Weilyngkut kum ka Kshaid,” ong u bah Samlin.
Une u MLA barim ka Sohiong ula ong ba ka NPP kadei kaba ialam ia ka sorkar, katba kiwei pat ki shu wan snoh ha ka Bos, kumta dei ban kyntiew iaka jingdon ki MLA ka NPP ha ka iing dorbar thawain na ka 26 ngut sha ka 27 ngut bad ki paidbah kila tip lypa mynta, mano ba ialam iaka sorkar kan suk shibun lada jied MLA ubala don lypa haka seng kaba ialam iaka sorkar jylla.
U Bah Samlin ula ong, ha ki snem ba la dep ka NPP kala mynjur iaka Resolution halor ka ILP bad ban pynrung ia ka ktien Khasi ha Eight Schedule, kala shimkhia ban pynbeit ia u pud u sam bad ka jylla Assam bad kala shimkhia ruh iaka mat ban pynkynriah ia kiba sah ha Them Metor.
Ula ong, ka daw kaba la pynlong ia u ban leit pyniasoh noh bad ka NPP kadei halor ka nongrim ban wanrah ia ka roi ka par, ban kyntiew ia ka pule puthi, ka iohkam iohjam bad ka umbam umdih ba ula iakren ruh bad u Symbud Myntri Rangbah ka jylla u bah Prestone Tynsong, ban thaw ia ki lad ban buh iaka Bank ha Weilyngut ban pynurlong ia ka jingangnud jong ki paidbah.
Une u kyrtong ula pynshai ruh ba ki mih ki jingkynthoh bad ki jingkynnoh kiba bun jait pyrshah ia ka seng NPP bad kane kadei tang na ka daw ba ki tieng ia ka NPP ba kala nang kiew arshah.
