Guwahati, Iaiong 21:Ka Rajiv Bhavan kaba dei ka headquarter jong ka Indian National Congress ha Guwahati ka la don ha ka jingkhihwin hadien ba ka party ka la pynkhreh ban weng noh ia ka president barim jong ka Assam Pradesh Youth Congress, ka Angkita Dutta.
Kane ka jingshim rai ka la wan long hadien ka jingujor ba la ujor da ka Angkita pyrshah ia u heh ka Indian Youth Congress (IYC) u Srinivas BV, ha kaba ka la kynnoh ia u halor ki kam banbor kiba la ktah ia ka bor pyrkhat pyrdain jong ka, nalor ka jingkren tohmet da ki kyntien ki bym sngewtynnad pyrshah ia ka.
Haba kren sha ka lad pathai khubor, u President ka Assam Pradesh Congress Committee, u Bhupen Kumar Borah u la ong ba ka jingshim rai ban weng noh ia ka Angkita Dutta ka shong ha ka All India Congress Committee.Watla katta la pan ruh ka jingpynshai na ka Angkita Dutta ha kaba iadei bad kane ka jingjia.U Borah u la ong ruh ba ki jingkynnoh ba la pynmih da ka Angkita pyrshah ia u Srinivas ki long ki bym iahap bad kiba ktah ia ka party Congress, bad kumta ruh kane ka lah ban pynlong ia ka Angkita ba kan shah weng noh na ka party.Watla katta kam pat shym la don kano kano ka jingshim ia ka rai kaba khatduh ha kaba iadei bad kane ka bynta, namar kane ka shong eh has ka All India Congress Committee.
Ha ka jingjia kaba pynkyndit, ka jingujor jong ka Angkita hapoh Dispur Police Station ha ka 19 tarik mynta u bnai ka la pynkhihwin ia ka seng Congress.Kine ki jingkynnoh kiba khias jong ka Angkita pyrshah ia u Srinivas ka pynpaw ruh ka jingsngewkhia halor ka jingshah banbein jong ki nongialam kiba dei ki kynthei hapoh ka party bad halor ki kynrum kynram ha ki jingtreikam hapoh ka party Congress.
Katkum ka jingujor jong ka Angkita la kynnoh ba u Srinivas u la leh ia ki kam banbor bad niewbein pyrshah ia ka da kaba pynmih ruh ia ki ktien kynthoh kiba harukom naduh kine ki hynriew bnai kiba la dep.Nalor kata ka la kam ruh ba u la pynmih da ki kyntien kiba khot bad byrthen ia ka ban leh da kaba tyngeh lada ka dang iai bteng ban ujor pyrshah ia u sha ki bor ba halor jong ka party.
Na ka liang ka Angkita kam shym la lah shuh ban pynsngap hadien ka jingjia kasba la jia hapoh ka hotel ha Chhattisgarh ha ka 25 tarik u bnai Lber ba la dep ha kaba ka la kynnoh ba u Srinivas u la ktahkti ia ka bad khynniat ia ka ha ryngkat ka byrngem byrsit da ki kyntien kiba khor.Wat hadien ba kala rah ia kane ka mat sha ki bor kiba halor, hynrei ka Angkita ka la ong ba ym shym la don ba pynsngap ia ka.
Ban pynphai kylliang ia kine ki jingkynnoh jong ka Angkita, u Srinivas u la ujor da ka mukotduma baimynrainkhmat pyrshah ia ka.Hynrei, watla katta na ka liang ka Angkita ka la ieng skhem ha la ka jong ka nongrim da kaba ong ba ka jingujor ka jong ka kam dei pyrshah ia ka party Congress hynrei pyrshah ia u Srinivas kum u briew shimet.
Na ka liang ki nongialam hapoh ka party ki la pynpaw ba ki nongialam ba halor jong ka party ki la shim khia halor kane ka bynta bad pynlong ruh da ka jingtohkit kaba bniah.
