Shillong, Iaiong 19 : U Managing Director ka Meghalaya Energy Corporation Limited (MeECL) Sanjay Goyal hynne ka sngi Balang, ula ban jur ia ka jingdonkam ban don ka jingpynmih bording lang na ki Hydro project bad ki Thermal Power project ban lah weng ia ka jingduna bording elektrik hapoh ka Jylla.
“Ngi dei ban don ia ki project pynmih bording na ki hydro bad kumjuh ruh ki thermal. Ngim pat don ia ki thermal project ia mynta bad ka thermal project ka dei kaba lah ban pynmih bording khlem ka jingthut kam pher la ka suin bneng ka long kumno kumno ruh” ong u Goyal haba iakren bad ki nongthoh khubor haba kdew ia ki sienjam ba donkam ban shim ha kaban lah weng ia ka jingduna bording hapoh ka Jylla.
Halor ki power project kiba la don ha ka jingpynkhreh ban pyntrei, une u MD ka MeECL ula ong ba ka jingpynkhreh ia ka Detailed Project Report (DPR) jong ka Myntdu-Leshka Stage-II ka dang don ha ka jingsdang. “Shisien ba ngi la pyndep ia ka DPR, ngin sa wad ia ka song pisa na ka bynta kane ka project kaba heh” ula ong haba bynrap “Ngi don jingthmu ban leh kumjuh kumba leh ia ka Stage-I, kaba lah ban pynmih bording kumba 210 MW”.
U Goyal ula pyntip ruh ba ka Corporation ka dang wad ia ki lad ki lynti ha kabna pynurlong ia ka Thermal Power Project.
“Hooid, baroh ka shong ha ka jingioh ia u dewiong bad ka jingtih dewiong da ka jingstad saian kaba ka Jylla ka dang jam shakhmat mynta bad pyrshang ban pynbeit noh ia kane ka kam ha ka lynti kaba sted bha” ula ong.
U Goyal ula pyntip ruh ba ka MeECL kala buh hakhmat ia 4-5 tylli ki power project kiba rit kiba lah ban pynmih hapdeng 5 haduh 10 MW bad ong “Hynrei kine ki dang don ha ka jingsdang ban pynkhreh bad kin dang shim por ban pyntreikam”.
Ha kajuh ka por, u Goyal ula ong ba ka Jylla ka dang wad ia ki lad ki lynti ban don noh da ka jingiateh kular bad kiwei ki Jylla “lyngba jong kin gin lah ban thied ia ka bording ha ka dor kaba rit”.
