Shillong, Iaiong 17 : U Myntri Rangbah ka Jylla Conrad K Sangma hynne ka sngi Nyngkong ula pyntip ba ka Sorkar kan sa khot ia ka jingialang hapoh kane ka taiew ban iakren halor ka jingpyntreikam ia ka Roster System jong ka Job Reservation Policy ka Jylla.
“Hapoh kane ka taiew hi, ngin sa khot ia ka Jingialang hapoh Iing jong ka Sorkar bad kan shim katto katne por ia ngi ban bishar ia baroh ki kot ki sla, ki hukum ka Iingkasahri bad kiwei kiwei” ong u Conrad haba iakren bad ki nongthoh khubor.
Ula pyntip ba hadien ka jingiakren hapoh ka Sorkar, ia kane yn sa rah ban iakren bad ki seng sain pyrthei lem bad ki kynhun bapher bapher ka Jylla.
“Hadien ba ngi la sngap ia baroh, ngin sa pyrkhat ba kumno ngin pyniaid shakhmat ia ka kam” ong u Conrad.
Haba pynpaw ba kane ka kam ka dei kaba jyrwit jyrwat bha, u Myntri Rangbah ula ong “Ngi hap ban khmih ia baroh ki liang, ngi hap ban khmih ia ki hukum jong ka Iingkashari bad kiwei kiwei ki kam kiba mih na ka. Hadien ba ngi la khmih lut ia ki bad hadien ba ngi la iasyllok bad baroh ki kynhun, ngin sa shim ia ka rai kaba iahap”.
Halor ka jingdawa ka VPP ban bishar thymmai ia ka State Reservation Policy, u Myntri Rangbah ula ong “Baroh ki don la ki jong ki jingsngew. Ngim don eiei ban ong halor ka jingsngew jong ki namar ha ka riti synshar paidbah ki dur jong baroh ki long kiba kongsan. Namar kata, lada kane ka seng sain pyrthei ka kren ia kane, mut ki don ia ka hok ban kren hynrei haba kut hi, ngi hap ban iakren bad baroh ki kynhun bad hadien ngin hap ban shim rai ia kaei kaba ai jingmyntoi bha”.
Ula kdew ruh ia kaei kaba jia ha Karnataka, kaba la iakynduh ia kum kane ka jinglong jingman namar ka Job Reservation ha ka elekshon bad ong “Kam dei kaba shu jia ryngkhat, kam dei kaei kaei kaba ki lah ban ong ba kum kane kam pat ju jia sha kiwei pat ki jaka. Kila jia sha kiwei kiwei ki jaka ruh hynrei kaei kaba kongsan ka long ba ngin donlang kawei. Ngi hap ban iapyrkhat kumno ba ngim jam shakhmat, kaei kaban pynmyntoi bha ia ka Jylla bad ki Nongshongshnong bad ngin sa shim ia ka rai”.
Halor ka jingdawa ia ka winter capital ha Tura, u Conrad ula ong “Nga ju ngeit bad nga la ju pyrkhat shai bha ba baroh kine ki ishu kiba mih ha ka imlang sahlang ki dei kiba don jingiadei bad ka ioh ka kot. Namar kata, ki don shibun ki lynti ban kyntiew ia ka ioh ka kot bad katto katne ki briew ki sngew ba da ka jingwanrah ia ka winter capital lane kiei kiei, kin plie lynti ia ka jingwan ka ioh ka kot bad ban thaw policy”.
