Nongstoin, Iaiong 16 : Ka la long ka jingkmen kaba khraw ia ki paid riewngeit jong ka Balang Katholik Jyllaniam Nongstoiñ namar mynta ka sngi la ioh ban pyndep ia ka jingpynkyntang ia u Rev Fr Wilbert Marwein kum u Lyngdoh sad ne Bishop ba thymmai bad ba pura ka Nongstoiñ.
Ka dei hadien lai snem ka jingap ba ka Nongstoin Diocese kala ioh ia u Bishai hadien ba u Bishop barim Victor Lyngdoh ula shah pynkynriah noh sha Shillong Diocese kum u Arch Bishop ka Shillong namar ka jingkhlad kyndit jong u (L) Most Rev Dominic Jala.
Ia u Rev Wilbeth Marwein la kha ha Rangblang kaba hap ha ka Archdiocese jong ka Shillong (mynta ka Diocese ka Nongstoin). Ula shah pynkyntang kum u Lyngdoh niam ha ka 27 tarik Iaiong, 2003 jong ka Archdiocese ka Shillong bad ha u snem 2006 ula leit pyniasoh sha ka Diocese ba thymmai.
La sdang ia katei ka jinglehniam Riti pynkyntang Lyngdoh sad da u Most Rev Victor Lyngdoh, Archbishop jong ka jylla niambah shillong ha ka jingsakhi lang u Most Rev Leopoldo Girelli Apostolic Nuncio sha india bad Nepal bad la pynlong ia katei ka sngi kyrpang ha St.Peter the Apostle Cathedral Parish jong ka Pyndengrei Nongstoiñ Dioscese.
Ha katei ka sngi la iadonlang ruh kiwei kiwei ki Archbishop, ki Bishop, ki phadar, ki sister, ki brother na ki jyllaniam bapher bapher kynthup kiba na ki jylla Lam Mihngi ka ri india, bad la wan ban sakhi lang ruh da u Myntri Ràngbah ka Jylla Meghalaya u Conrad K. Sangma, u Bah Vincent H. Pala MP Shillong bad ki Myntri sorkar.
Ha ka nohphai sngi pat la ioh ban pyndep ia ka jingmane Sakramen da u bishop bathymmai u Most Rev Wilbert Marwein bad hadien nangta la ïoh ka jinglehburom ia u Bishop bathymmai da ki paid riewngeit ka jylla niam Nongstoiñ.
