Shillong, Iaiong 16: U MLA ka Mylliem bah Ronnie V Lyngdoh u la ong, ka seng Congress ka don ia ka jingkyrmen ban jop iaka elekshon MLA na Sohiong Constituency namar ki paidbah kila iohi ia ka rukom treikam kane ka sorkar bad ki seng saiñ pyrthei kiba donlang bad kumta ki paidbah kin sa ai iaka jubab kaba biang bha.
“Ki paidbah ka Sohiong mynta kila stad bad kin sa ai iaka jubab kaba biang bha haka elekshon MLA jong ka Sohiong Constituency, hadien ba kila sakhi ba ka United Democratic Party (UDP) kala leit ban thaw sorkar lang bad ka seng National Peoples’ Party (NPP)” ong u Bah RV Lyngdoh.
Une u nongialam jong ka Congress Legislative Party (CLP), ula ong, ha ka por elekshon MLA ka UDP kala thet kti ha kine ki san snem ba la dep watla kila donlang ha ka sorkar MDA barim, hynrei ka UDP wat tang shi sngi ruh kam shym la ap hynrei kala mareh bran bran ban thaw sorkar lang bad ka NPP, kumta u paidbah ka Sohiong un sa ai ia ka jubab ha ka elekshon kaban long shen.
“Ka Congress ka kyrmen skhem ba ka elekshon ha Sohiong kan pynkiew jingkhein ia ka seng ia ka jingdon ki MLA ha ka Iing Dorbar thawain ka jylla na ka 5 ngut sha ka 6 ngut,” ong u bah Ronnie.
Ula ong, ka seng Congress ka don ia ki mat ba kongsan ban wanrah ia ka synshar khaddar kaba beit, kaba pyrkhat naka bynta ka jingmyntoi jong ki paidbah ha kaba ka khajna kan ym lait ei na ka pla jong ka sorkar sha kino kino ki riew shimet.
