Shillong, Iaiong 14: Ka seng Hynñiewtrep National Youth Movement (HNYM) hynne ka sngi kala pynpaw ka jingbitar pyrshah iaka seng ACHIK kaba la byrngem ban mudui sha ing bishar ba heh duh ka ri India ka Supreme Court lada ka sorkar Meghalaya kam bteng ban pyntreikam iaka Roster System naduh u snem 1972.
Haba kren sha ki lad pathai khubor u president ka HNYM u bah Loius Dohtdong ila ong ba kane ka jingiai byrngem bad dawa ka ACHIK ban pyntreikam beit iaka Roster System naduh 1972 kala pynkhih win ia ka jylla Meghalaya baroh kawei.
U bah Loius ula ong ba ka seng HNYM ka dap daka jingsngewkhia halor kane namar ka jingpyntreikam iaka Roster system naduh 1972 kala wanrah lypa ka jingduh nong ka ba khraw iaki khun samla ka rilum Khasi-Jaintia Hills.
Ula ong ba ka seng kam pyrshah ia ka jingpyntreikam ia ka Roster System jong ka bhah thungkam lane ka Reservation Policy hynrei ka pyrshah pat ban pyntreikam naduh u snem 1972.
“Ka sorkar kadei ban pyntreikam ia ka Roster System naduh u snem ba ka pynmih ia ka Office Memorandum (MO) lane naduh u snem baka sorkar ka mynjur iaka Roster lane ka seng ka ieh haka jingstad jong ka sorkar naduh u snem aiu ban pyntreikam iaka Roster, hynrei kam dei pat naduh 1972” la ong u bah Loius.
U bah Loius ula ong ba ka seng kam sngewiahap ia ka jingdawa jong ki jaitbynriew Garo ban pyntreikam ia ka Roster System naduh u snem 1972 namar ba ka long kaba noh shilliang tang ha ki jaitbynriew Garo bad kala wanrah ka jingduhnong iaki samla ka rilum Khasi-Jaintia Hills.
Ula ong ba shen ka seng kan sa leit ban kynduh ia u myntri rangbah ka jylla u Conrad K Sangma ban dawa ban khot noh daka Special Session ban iathir iaka jingdonkam ban bishar bniah biang iaka Reservation Policy bad kumjuh ruh ia u snem ban pyntreikam iaka Roster System.
“Ka seng ka long ka ba la kloi ban mih madan ban iakhun pyrshah iaka sorkar lada, ka jingpyntreikam iaka Roster System ka iai neh beit 1972” ula ong.
