Guwahati, Iaiong 14 : Ka jingiatyngkhuh hapdeng ki briew ba ki mrad ha ki bynta ka Assam ka la nangkiew katba nang mih ki sngi, bad ha ka 14 tarik mynta u bnai ki khubor ki iathuh ba haduh sawngut ki briew kila mynsaw jur hadien ba ki la shah thombor ha kawei ka Dngiem khlaw hapoh Chirang district.
Ki khubor ki iathuh ba katei ka jingjia ka la jia hapoh ka shnong Dadarpur kaba hap hapoh Amguri police station jong ka district, kata hadien ba kawei ka Dngiem ka la wan mih paw sha katei ka shnong ha ka por mynstep bad wanrah ka jingkhihwin hapdeng ki paidbah nongshong shnong.
Napdeng kiba mynsaw ha katei ka jingjia ki kynthup ia u Iman Hasan, Abdul Jalil bad u Ziarul kiba dei na katei ka jaka ia kiba la pynkit noh mardor shapoh JSB Civil Hospital ha Kajalgaon na ka bynta ban ioh jingsumar.
Na ka liang ki bor sorkar bad pulit ki la wan poi mardor ha katei ka jaka ban bishar bniah halor ka jinglong jingman baroh.
Kane kam dei satia ka sien kaba nyngkong ha kaba kala don ka jingiatyngkhuh hapdeng ki briew bad ki Dngiem hapoh Assam, kham hashwa ruh, kata ha u snem 2021, uwei u briew u la mynsaw jur na ka jingshah thombor kawei ka Dngiem hapoh Mushalpur kaba hapoh Baksa district.
Ia une u briew uba la mynsaw la tip kyrteng kum u Sonaram Brahma uba dei na ka shnong Pub-Banglabari kaba haMushalpur.Une u briew u la shah thombor ha ka dngiem khlaw kaba la wan poi hapoh katei ka shnong na ki jaka khlaw ba marjan na ka bynta ban wad bam.
