Shillong, Iaiong 13: Ka Hynñiewtrep Youth Council (HYC) hynne ka sngi ka la dawa na ka sorkar jylla ban iakren bad ka sorkar Bihar ba kan pynshitom ia ki briew kiba donkti ban ktah kti iaki 2 ngut ki nongialam niam ka Jylla.
Haba kren sha ki lad pathai khubor u president ka HYC u bah Robertjune Kharjahrin ula ong ba ka seng ka dawa ruh naka tnad kam pohïing ka sorkar pdeng ban pynthikna ia ka jingshngaiñ jong ki kynhun niam bapher bapher ha kylleng ka Ri India.
U bah Robert ula ong ba ka riti synshar khadar ka Ri India ka shah ïa kino kino ki nongïalam niam ban leit na ka bynta ki kam niam bad ha Meghalaya ruh ka don ka jingshong suk hapdeng ki jait niam baroh bad ka seng ka kyrmen ba kane kajuh ka mynsiem jong ka jingburom ïa baroh ki jait niam la pdiang ha kiwei pat ki bynta jong ka Ri.
“Ka jingshah ktah kti u Pastor bad Tynmen basan ka long ka bym lah ban pdiang bad ka seng ka la kyntu ruh ïa ka sorkar Meghalaya ban buddien ïa kane ka jingjia ryngkat ka jylla Bihar khnang ban pynthikna ba ki riew runar kiba donkti ha kane ka jingjia kin shah pynshitom katkum ka aiñ” la ong u bah Robert.
Nalor kane u bah Robert ula la kyrpad ruh ïa ki nongshong shnong ka jylla ban ym leh eiei khlem da tip lut ïa ka jingjia naduh sdang haduh kut namar teng teng haba jia ki jingjia kum kine, ki paidbah ju leh khluit khlem da tip ïa ka jingjia naduh sdang haduh kut, bad teng teng la ju pynheh ruh ïa ka jingjia.
