Shillong Iaiong 13: U President ka Meghalaya Pradesh Congres Committee (MPCC) u Bah Vincent Pala, ula ong, ka seng Congress kan jop iaka elekshon MLA na Sohiong Constituency namar ba ki paidbah kila ngiah ia ka sorkar synroplang haka jylla.
“Ngi lah lum iaka jingialang mynne ka sngi bad ki nongialam bad nongkitkam ka seng Congress bad u kyrtong uban iakhun iaka elekshon ruh ula don lang ha kaba ula pynpaw ba ka lyer ka long kaba biang ba yn jop ia ka elekshon” ong u Bah Pala.
“Ka Congress ka don ha ka kyrdan kaba biang bha namar ba ki paidbah kila thait ia kane ka sorkar bad ki phai sha ka seng Congress kumba ka long mynta. Ngim don ka jingartatien haba ngi iohsngew ia kane hynrei ngi hap ban trei shitom ban jop ia ka elekshon” ula bynrap.
U Bah Pala ula ong, “Ki don ar tylli ki daw ba ka Congress kan jop ia ka elekshon namar ba u Bah Samlin Malngiang ha ka elekshon MLA kaba la dep ula jop na ka HSPDP hynrei mynta ula phet seng noh ban iakhun naka NPP bad ki paidbah ki pyrshah ia ka seng NPP”.
U Bah Pala ula ong ruh ba u Bah Synsharlang Kupar Lyngdoh kyrtong ka UDP u dei uba khlem kyrshan satia ia u (L) bah HDR Lyngdoh haka elekshon MLA 2018 ha ka por ba u iakhun na ka seng Congress, kumta ka jingsngewlem kan ym treikam ia u briew uba la donkti ha kaban pynrem ia la u jong u Mama bad ki paidbah ka Sohiong ki sngewthuh kham bha ban ia kiwei pat ki briew kiba nabar ka constituency.
U President ka MPCC ula ong, ba ka Congress kan trei shitom ban jop ia katei ka elekshon ha Sohiong khnang ba ia ka kam Nongialam ka Liang Pyrshah ha ka iing Dorbar Thawain ka jylla yn ioh ban bat da ka seng Congress.
“Ha ka jingialang mynne, ngi la iatai sani bha ha kaba iadei bad katei ka elekshon, namar lada ngi jop ka Congress kan ioh ban ialam iaka Liang Pyrshah bad ngi kyntu ia ki paidbah ba kin pynjop ia u kyrtong ka Congress khnang ba ka jylla kan ioh ia ka Liang Pyrshah kaba khlain bad ki paidbah kim dei ban ngop ha kino kino ki jingshah pynbeij” ong u President ka MPCC.
