Imphal, Iaiong 13: Ki heh pulit ka Manipur ki la pulom ban ioh kem iano iano wat hadien lai sngi ka jingshah lute ki tiar siat ia kaba la suba jur halor ka jingdonkti jong ki lehnoh kiba dei na ka kynhun Kuki Independent Army (KIA).
Ha ka 9 tarik mynta u bnai, ki suba dkhot jong ka kynhun Kuki Independent Army (KIA) ki la ioh ban lute haduh 25 tylli ki tiar siat na ka jaka buh ia ki tiar siat jong ki laitylli ki kynhun seng lehnoh kiba don hapdeng ki ktem sah shipor ba la pynkhreh da ka sorkar hapoh ki kyndon jong ka jingiateh ba la tip kum ka Suspension of Operations (SoO) agreement ha Manipur.
Watla kane ka jingjia ka la jia naduh kine ki lai sngi ba la dep, hynrei ym pat shym la don iwei ruh ki ban shah kem halor kane ka jingjia, ong u heh pulit.
“Haduh mynta hi ym pat shym la ioh kem iano iano ruh ha kaba iadei bad ka jingjia shah lute ki tiar siat ha ki dkhot jong ka kynhun kieng atiar KIA (ia kaba la tip ruh kum ka Kuki Independent Organisation) napoh ka ktem jong ki laitylli ki kynhun kieng atiar kaba don ha Chungkhao kaba hap haoh Churachandpur district khappud bad ka Myanmar,” ong u heh pulit.
Ki lehnoh jong ki laitylli ki kynhun kieng atiar, kata ka Kuki National Army (KNA), Zomi Revolutionary Army (ZRA) bad ka Kuki Revolutionary Army (KRA) ki la shong hapoh ki ktem sah shipor hadien ba ka sorkar pdeng bad ka sorkar Manipur ki la ia soi ia ka jingiateh bad kine ki kynhun kieng atiar naduh ka 22 tarik u Nailur 2008.
Kane ka kynhun kieng atiar ka Manipur, ka KIA ka dei ka bym ia don bynta ha kaba iadei bad katei ka jingiateh hapdeng kitei ki kynhun ban pynjari ia ka jingsangeh iasiat bad ka sorkar.
Na ka liang ki bor pulit ka Manipur kham hashwa ki la pynbna ia ka khusnam kaba T.50,000 na ka bynta kino kino ki briew kiba lah ban aijingtip ka ban lam sha ka jingioh kem ia u heh nongialam jong katei ka kynhun KIA u Thangkhongam Haokip (40 snem rta), ia kaba la pynbna hashwa ba katei ka jingshah lute ki tiar siat kan wan jia.
