Guwahati, Iaiong 13:Ha ka jingrakhe ia ka Rongali Bihu, kaba long ka dak ka jingsdang ia ka snem thymmai jong ki Assamese, ka Assam ka la pyrshang ban thaw ia ka ‘Guinness World Record’ lyngba ka jingrakhe Bihu kaba heh tam tang ha kawei ka jaka.Haduh kumba 11,000 ngut ki nongshad bad ki nongtem ksing ki la pynkhreh ban iashim bynta ha ka jingshad Bihu hapoh Sarusajai Stadium ha Guwahati mynta ka sngi Palei.
Katkum u Myntri Rangbah (CM) ka Assam u Himanta Biswa Sarma la ong ba ka jingthmu ka long ban pynlong ia ka jingshad Bihu kaba heh tam tang ha kawei ka jaka bad ban ioh rung hapoh ka ‘Guinness Book of World Records’ ha kaba iadei bad ka thup jong ki jingshad tynrai kiba katkum ka kolshor.
“Kane ka jingiashim bynta kan neh tang kumba 15 minit.Hynrei, ka jingpynkhreh ha kaba iadei bad kane ka long kaba jur, kata kaba sdang lyngba ka jingwad ia ki nongtem nongput, nongrwai bad ki nongshad,” ong shuh shuh u Sarma.
Katkum ki heh sorkar, haduh 70 percent na ki nongiashim bynta kin dei ki kynthei bad 30 percent ki shynrang, kata ka ban kynthup ia ki nongrwai bad ki nongtem nongput ki ban pyndonkam ia ki tiar tynrai ba la tip kum ki dhol, taal, gogona, toka, pepa bad xutuli.
Ia ki nongiashim bynta la wer na baroh ki bynta jong ka jylla, kata kumba 1,400 ngut na Dibrugarh bad tang 20 ngut na South Salmara.
Ka bynta kaba kongsan jong kane ka jingpynkhreh ka long ha kaba iadei bad ka jingpyniahap ryngkat lang hapdeng ki 11,140 ngut ki nongshad kiba la wan na ki bynta bapher baphr ka jylla hapoh kane ka rynsan.
