Shillong, Iaiong 13 : Ki arngut ki MLA ka Peoples Democratic Front (PDF) ki lah ban leit iasoh noh sha ka National Peoples Party (NPP) hashuwa jong ka elekshon MLA ban long ha Sohiong constituency.
Haba iakren bad u Working President ka PDF uba dei ruh u MLA ka Mawkynrew Bah Banteidor Lyngdoh, u khlem kyntait ia kane ka khubor bad ong ba ka party kan sa iakren ia kane ka kam ynda la dei ka por bad kam don eiei ban thoh shaphang kane.
Une u Myntri Sorkar barim, ula kubur ba kala don ka jingiakren ban leit synrop noh sha ka NPP. “Ka jingiakren kala don bad ngin sa shim ia ka rai ha ka por kaba dei bad ngin sa pyntip sha phi” ula ong.
Haba kylli, u Bah Bantei ula ong ba um lah satia ban kren eiei palat ia kane namar ia ka rai hi un ym lah ban shim marwei.
Kumjuh ruh u President ka PDF Bah Gavin haba kyntait ban batai bniah, ula pyntip ba ka don ka jingtyrwa na ka NPP ia ka PDF hynrei u ong ba ka por kan sa batai.
Kane ka jinglong jingman ha ka sain pyrthei kala pynmih pat ia kawei ka hamsaia ba kan sa don ka jingbujli ia ka shuki Myntri ha ka Sorkar MDA ban ai jaka ia uwei u MLA ka PDF ha ka kynhun Myntri.
Uwei na ki MLA ka PDF un ioh ia ka shuki Myntri bad uwei pat un ioh ia ka kam Advisor jong u Myntri Rangbah ka Jylla lane ka kam Chairman.
Ka United Democratic Party (UDP) kaba dei ka paty ba khatduh eh ban wan kyrshan ia ka NPP ha kaban thaw ia ka Sorkar MDA-II, kala ioh artylli ki shuki Myntri.
U MLA ka West Shillong bah Paul Lyngdoh ula shah thung kum u Myntri ba khmih ia ka Tnad Tourism bad ruh kum u Nongaiktien ka Sorkar lem bad u MLA ka Khliehriat ma Kyrmen Shylla uba ioh bat ia ka shuki kum u Myntri ka Taxation bad kiwei kiwei.
Kat kum ka khubor la ong ba u ma Kyrmen Shylla u lah ban shah weng noh na ka shuki Myntri bad u MLA ka Mawkynrew Bah Banteidor Lyngdoh un sa shimti ia kane ka shuki bad kumjuh ruh ia ka bhah kam.
Ha kajuh ka por, ki arngut ki MLA ka HSPDP ba kynthup ia u Bah Shakliar Warkri (Mawthadraishan) bad Bah Methodius Dkhar (Mawshyntut), kilakyntait ba ka don ka jingthmu ban leit synrop noh sha ka NPP.
“Kam don satia kano kano ka jingthmu ban leit synrop sah ka NPP” ong u Bah Shakliar.
