Shillong, Iaiong 12 : Ka United Democratic Parrty (UDP) hynne ka sngi Balang, kala kyntu ia ka Sorkar Pdeng ban ym pynshlur ia ki kynhun shitniam kiba pyrshang ban wanrah ia ka mynsiem ka jingisih bad jingshun.
“Ngi kyrpad ia ka Sorkar ba synshar ba kan shim ia ka sienjam ba tyngeh ha kaban tehlakam ia ki kynhun shitniam kiba pyrshang ban wanrah ia ka mynsiem ka jingisih bad jingshun. Burom ia baroh ki Niam ka dei kaba hap ban iabat” ong u General Secretary ka UDP Dr Jemino Mawthoh ha ka kyrwoh.
Ula ong ba ka UDP ka pynpaw ia ka jingsngewsyier ba lah ban mih kaei kaei kaba sniew halor ka khubor ba arngut ki Nongialam na ka Jylla kila shah ktah kti. “Lada ka khubor ka dei kaba shisha, dei ia kaban pynrem jur bha. Ka India ka dei ka Ri ba burom ia baroh ki jait niam, kano kano ka jingibein ne kam thombor da ki kynhun shitniam jong kino kino ki niam kam dei satia ka kam ban shu iasngap” bynrap u Dr Jemino.
