Shillong, Iaiong 12: Ka Election Committee jong ka Khasi Students’ Union (KSU), kaban pyniaid ia ka ilekshon kaba XV (15) jong ka seng naka bynta ka samoi treikam 2023-2026, ka pynbna ban pynlong iaka ilekshon ha ka 06 tarik u Jymmang, 2023 naduh ka por 8 baje mynstep haduh 3 baje janmiet ha Dinam Hall, Jaiaw, Shillong.
Katkum ka kyrwoh na u Danny M. Khyriem, Chairman, Election Committee bad u Bah Samuel B. Jyrwa Secretary jong ka Election Committee, kila iawer ia ki dkhot jong ki Unit bapher bapher ka KSU ba kin mih shakhmat da kaba iashimbynta shitrhem kum ki kyrtong ha katei ka ilekshon bad ia ki jingtip ba bniah halor kane ka kam, lah ban ioh na ka ophis treikam ka KSU ha Jaiaw Chapel Road, Shillong.
Kila pyntip ba ia ki Nomination Paper yn sdang ban ai naduh ka 14 tarik u Iaiong haduh ka 20 tarik u Iaiong, 2023 naduh ka por 11 baje mynstep haduh 5 baje janmiet na ka Ophis treikam ka KSU bad ka jingpynpoi ia ki nomination paper kan long naduh ka 15 tarik u Iaiong haduh ka 20 tarik u Iaiong, 2023 haduh ka por 5 baje janmiet bad ka Jingweng kyrteng lada don kan long ha ka 21 tarik u Iaiong haduh ka por 5 baje janmiet.
Ka jingbishar ia ki nomination paper kan long ha ka 22 tarik u Iaiong, 2023 ha ka por 1 baje nohphai sngi.
Ka Election Committee ka bthah ia baroh ki Unit, Circle, Area Unit, Division bad District Unit ban pynpoi ia ki kyrteng jong ki nongjied kaba long 10 ngut na kawei kawei ka Unit hapoh ka 25 tarik u Iaiong, ha Ophis treikam jong ka Seng.
Ki post kiban pyniakhun ki long President, Vice-President, General Secretary, Assistant General Secretary, Education Secretary, Organising Secretary, Information & Publicity Secretary, Office Secretary, Sports & Cultural Secretary bad Environment Secretary bad yn pynbna ia ka result ha kane ka juh hi ka sngi ba pynlong iaka elekshon.
Ka Committee kala pyntip ba kala jied ia ki katto katne ki riew rangbah ki nonghikai bad na ka liang ki lad pathai khubor ban long kum ki nongpeit pyrman ia ka jingiaid beit iaid ryntih jong kane ka ilekshon.
