Shillong, Iaiong 12: U Symbud Myntri Rangbah ka jylla u Bah Prestone Tynsong, hynne ka sngi Balang ula lum iaka jingialang bad ki heh sorkar na ka bynta ban pynkhreh iaka jingthmu ban pynlong iaka jingialang jong ka G20 kaban long ha ka nongbah Shillong.
“Ngi la don iaka jingialang bad baroh ki tnad sorkar bad nga dap da ka jingsngewtynnad ba ngi la lah long kiba kloi ban pynlong iaka jingialang jong ka G20 ha ka nongbah Shillong haka 15 bad 17 tarik mynta u bnai” ong u Bah Prestone Tynsong.
“Ngam lah ban iathuh lut ia ki jingpynkhreh jong ka sorkar jylla namar ki don bun, la kadei ka jingpynitynnad, ka jingmaramot, ka jingpynbiang ia ki lad jingiada, ka jingpynkhreh ia ki kali. Ngi la iatai sani bha ia baroh ki jongdonkam bad mynta ngi la long kiba la pynkhreh ban pdiangsngewbha bad ban pynlong iaka jingialang jong ka G20 kaba seisoh” ong u Symbud Myntri Rangbah ka jylla.
U la iathuh ba ha katei ka jingialang kin don 120 ngut ki heh kiban wan iashimbynta haka jingialang na ki kylleng ki Ri kiba don hapoh jongka kynhun G20 ha kaba la pynkhreh ia ka jaka sah ka jongki hapoh Marriott Hotel bad iaka jingialang ruh yn pynlong hi ha katei ka jaka.
U Bah Prestone ula ong, ba la dep ban iakren sani bad bthah ruh ia ki tnad kiba dei khmih bad kumjuh ia u Deputy Commissioner, ka tnad Pulit bad ia u SP Traffic ban pynkhreh ia ki jingtip bad ban ai iaka jingbthah kaba shai kdar ia ki surok kaba ki VVIP ne ki heh ki hain, kin leit kin wan.
Ha kaba iadei bad ka shongsuk shongsaiñ, u Bah Prestone ula pynthikna ba ka jinglong jingman ha ka jylla ka long kaba biang bha bad kitei ki heh ki hain kiban wan poi ha Shillong kin sngewkmen bad kan long ruh ka burom iaka jylla Meghalaya.
