Shillong, Naitung 01: Ka Jaintia Students Movement (JSM) hynne ka sngi thohdieng, kala aipor 5 sngi ia ka Sorkar Jylla ban pynkiew noh ia ka tulop jong ki nonghikai skul Adhoc lem kumta, ka seng kan khot da ka jingiakhih ba 12 kynta ha ki artylli ki District ka Ri-lum Jaintia.
Ha ka kyrwoh, u President ka JSM u Leningstar Rymbai ula ong baka seng kam banse ban khot ia ka jingiakhih ha baroh ka Ri-lum Jaintia naduh ka por 5 baje mynstep haduh 5 baje janmiet jong ka 8 tarik Naitung, lada ka Sorkar ka dang iai sngap mynthi ia ka jingdawa ki nonghikai Adhoc.
Ki Nonghikai hapoh ka lama jong ka FASTOM kila pynlong ia ka jingiakhih ba khlem buh por da kaba shong kyllain myngor hakhmat Secretary ban pyrshah ia ka jingpynslem ka Sorkar Jylla ban pynkiew ia ka tulop jong ki da T. 18000 bad 5% ka increment manla u snem.
Ka JSM kala pynpaw ia ka jingiadon ryngkat bad ki nonghikai Adhoc kiba la hap ban shong, bam bad thiah ha surok ha Shillong ban dawa iala ka jong ka hok.
