Shillong, Iaiong 11: Ka Garo Students’ Union (GSU) kala byrngem ba ka seng bad ki jaitbynriew Garo kan nym shong kli kti lada don ka jingmushlia iaka bhah thungkam lane ka Meghalaya Job Reservation Policy 1972.
“Kane ka jingiakren halor ka Roster System kam dei ban long ka jingleh politics halor ka bhah thungkam lane ka Meghalaya Job Reservation Policy 1972 bad naka liang ka GSU ka kwah ban kren shai ba lada don ba mushlia iaka bhah thungkam, ki jaitbynriew Garo ruh kim nym lah ban shu shong kli kti” ong u president ka GSU Tengsak Gabil Momin.
U Tengsak Gabil Momin ula ong ba ka jingpyntreikam iaka Roster System kadei kaba la pyntreikam da ka Sorkar Jylla lyngba ka hukum ka Iingkashari Meghalaya High Court ha u bnai Iaiong 2022.
“Ka jingiakren ban pyntreikam iaka Roster System naduh 1972 lane ban pyntreikam naduh ki sngi bala mynjur kadei kaba bha tam ia baroh bad mano mano ruh kim dei shuh ban mushlia ia kaei kaba ki longshwa mynshwa ki la shim iaka rai halor ka bhah thungkam lane ka Meghalaya Reservation Policy, 1972 bad ka GSU ka iaroh iaka jingpyntreikam iaka Roster System” ula ong.
Ula ong ba kadei kaba shisha ba ka thain bad ki jaitbynriew ka thain Garo hill ki sahdien haka liang ka pule puthi namar ki lad jingpule kum ka Engineering College, ki Model Colleges bad ki Medical College haduh mynta kim pat treikam bad kane kala pynlong ban wanrah iaka Meghalaya Reservation Policy 1972 kaba bha naka bynta baroh khamtam iaka thain Garo Hills kaba dang shah ieh khunswet haka liang pule puthi.
Haba iaroh iaka sorkar jylla kaba la kdew ba ka thain Garo hills kala shah ieh bein haka liang ka thungkam thungjam, u president ka GSU ula ong ba ka seng ka iaroh iaka Meghalaya High Court kaba la bthah iaka sorkar ban pyntreikam iaka Roster System.
Ula ong ba ka clause No. 1.2 jong ka reservation policy 1972 ka kdew shai ba lada don kano kano ka jingdkoh haka jingthungkam, yn lah ruh ban bteng iaka rukom thungkam ha kiwei pat ki snem bad kane kadei namar ka jingbym don ka Roster System.
Shuh shuh ula ong ba ha u snem 2007, ka GSU kala lap ba ka jingdkoh ka rukom thungkam kaba khuid kadei hi namar ka jingbym don ka Roster System kaba la wanrah ka jingduhnong iaki jaitbynriew Garo ha ki 500 tylli ki kam ba hu khein malu mala bad mynta kane kala nang kiew shuh shuh.
Nalor kane u president ka GSU ula ong ba ka seng kam pdiang iaka jingai jingmut ka VPP ba iaka bhah thungkam lane ka Job Reservation Policy (JRP) ba dei ban leh katkum ka jingdon ki paid nongshongshnong.
U Tengsak ula ong ruh ba ka GSU ka pyrshah jur ia kane ka jingai jingmut namar kiba bun ki daw kum ka jingbym biang ka pule ka dangle, ki jaka pule bad kiwei kiwei kala biang palat ban iasngewthuh da baroh ba ka long ka jingduhnong ia ki paid Garo.
