Shillong, Iaiong 11: Ka Voice of the People Party (VPP) ka ai ka jingiaroh ia ki sengbhalang bapher bapher bad ki riewshimet kiba la ai jingkyrshan ïaka jingïaleh ka Party ban pynsangeh shwa ha ka ban pyntreikam ïaka roster system kat bym pat pyndep ïaka jingpynkylla ïa ka jingbhah kam.
U Nongaiktien ka VPP u Dr Batskhem Myrboh ula pynpaw ba ka seng ka kut jingmut ban nangpynkhlaiñ shuh ïaka jingdawa bad jingïaleh ban wanrah ïa ka jingpynkylla ïa ka rukom bhah kam naka bynta ka jingbiang lang jong baroh ha ka jylla.
“Ka long kaba donkam eh ban ngin long kiba ïatylli mlon baroh hapoh ka jingïalam ka VPP namar dei tang kane ka Party kaba buh ïa kane ka mat ha ka thup kular elekshon (manisfesto) jongka. Ka jingpyrshang jong ki katto katne ban pynsaphret ïa ka sur u paidbah hadien ka elekshon ha kaba ïadei bad kane ka kam kan wanrah tang ka jingshah rem bad ka jinglehraiñ. Ka mynnor ka sakhi shai wat haba bun ki nongïalam sengbhalang kiba mih shakhmat ban dawa ïa ka jingpynkylla ïa kane ka rukom bhah kam kaba dkoh ha ba bun ki liang hynrei ki leh klet pat haba kila long ki nongïalam ha ki party bapher bapher” ong u Dr Myrboh.
“Ka Party ka ïawer ïa iwei pa iwei ban iasnohktilang bad ka VPP ha ka jingïaleh jongka khnang ban ngin ioh ïaka jingjop. Kumba la pynbna mynshwa, ka Party nalor ba kan ïakren bad ïa ka sorkar kan pynlong ruh ki jingïalang ha kylleng ka jylla ban pynshai sha ki paidbah ïa ka jingdonkam ban pynsangeh shwa ïa ka roster system bad ban pynkylla ïa ka rukom bhah kam” ong u Nongaiktien ka VPP.
Pule lang ia kane: Khlad u heprit bad mynsaw ki bahaiing ba bhen u diengbah ha Umling
