Shillong, Iaiong 11 : U Symbud Myntri Rangbah ka Jylla Bah Prestone Tynsong, hynne ka sngi Ba-ar ula kyntu ia ki paid nongshongshnong ka Jylla ban nym pynsaphriang ia ka video ba shah bat ki Nongialam Niam na Meghalaya ha ki dkhot ka Bajrang Dal ha Patna, Bihar bad ba aiti sha ki Pulit.
U Symbud Myntri Rangbah ula kyntu ia ki paidbah ba kin ym pynsaphriang ia ki jingtip ka bym dei, kaba lah ban wanrah ia ka jingkynad sngew phew jaitbynriew hapoh ka Jylla.
Haba pynshai ia kaei kaba jia, u Bah Prestone ula ong ba ka don tang ka jingiapynphai ktien markylliang bad ki Nongialam Niam kim shym la shah ktah kti satia.
Haba pynsngew ia ka jingsngewkhia ba ka jingpynsaphriang ia ka khubor thok ka lah ban lam sha ka jingiakynad sngew pher jaidbynriew ha Jylla, ula kyntu ia ki paidbah ban kiar na ka jingpynsaphriang ia ka video ha ki social media.
U Bah Prestone ula kular ba ka Sorkar kala shimkhia ia kane ka kam bad kala shim ruh ia ka sienjam ba dei ban shim.
U pyntip ba u Chief Secretary ka Jylla bad ki Heh Pulit kila dep iakren bad ki Ophisar jong ka Bihar bad la kyrpad ruh ban ai ka jingpahara ia ki arngut ki Nongialam Niam. U Bah Prestone ula pynthikna ba kane ka dei ka dei kaba la dep iapynbeit hapdeng ki arliang mamla.
Kine ki arngut ki Nongialam Niam la khmih lynti ba kin wan poi mynta ka janmiet ha Guwahati hadien ba kila mih noh na Patna mar syn jia kane ka jingjia.
U Superintendent of Police ka East Khasi Hills Bah S Nongtnger, ula pyntip ba u Director General of Police (DGP) ka Jylla bad ki Pulit ka East Khasi Hills kila phone hi dalade sha u Superintendent of Police ka Patnad bad Superintendent of Police (Sity) East Patna halor ka jingioh jingtip ia kane ka khubor ba saphriang ha ki social media ba shah shoh ki arngut ki
Nongialam Niam na Shillong ha Bihar.
Kat kum ka jingong jong u, la ioh khubor ba ha ka por 1:30 baje hynne ka janmiet, ka khubor hasaia kala saphriang b aka don ka jingpynkylla niam ha kawei ka Iing ha Patna ha kaba ki briew kila leit ban khynra kaba lam sha ka jingiania bad ktah kti ia ki briew ba don hapoh ka Iing.
U ong ba ki Pulit ka Alamganj Police Station kila wan poi ha kane ka jaka bad kila synran noh ia kine ki arngut ki Nongialam Niam ba khlem don jingmynsaw eiei ruh em sha Thanad ban ai jingiada.
U pyntip ba la dep iakren ruh bad ki Pulit ka Bihar ba kin ai ka jingpahara bad jingiada ia kine ki arngut ba kin wan phai sha Shillong. U ong ba ki Pulit ka Bihar kila synran ia kine ki arngut haduh ha liengsuin bad ka jingtohkit mynta kala iaid shakhmat pyrshah ia kine ki nongleit pynkulmar.
Pule lang ia kane: Mynsaw 15 ngut naka jingkylla ka bolero pik-up
